Ăh tŏk bŏk khei 4 tŏ hlơ hlĕng, bri Yok Đôn tŏ nhen unh xa, 8 ‘nu lơ̆m Anih jang hơlen ‘bri ‘long kơsô̆ 1, Anih jang Hơlen bri ‘long tơ̆ pơgar York Đôn (Đăk Lăk) adoi oei hăt hot chă choh chong ‘ngiĕt uh vă pơm kiơ̆ tơdrong jang “soh hơmet kiơ̆ kih thuơ̆t kiơ̆ sơkơ̆t”.

Ƀok Nguyễn Hữu Tạo – Phŏ Kơdră jang Hơlen bri ‘long tơ̆ pơgar York Đôn tơroi, tŏk bŏk ăh khei tơm kơ pơyan phang, tơdrong unh sa bri ƀônh kơ đei păng tôch hli hlơt. Vă tang găn păng pĭt unh sa bri, anih jang hlôi jang atŭm hăm rim khul vei bri asong jê̆ 200 kang ƀô̆, bơngai jang vă dăr joang vei lăng păng tang găn unh sa bri:“Tôm anih gak hơlen, khul jang athei vei lăng măng năr hloi tơ̆ dôm anih ƀônh ƀơm unh sa, pơm kiơ̆ tơchơ̆t soh lê̆ rơm rĕk uh iĕ lơ̆m minh bro. Dang bơ̆n athei hơlen, pơtih ăh anih âu ƀôh unh sa noh ba soh vă da ƀiơ̆ đei tơmam ƀônh pơm unh sa, păng truh ‘năr đơ̆ng rŏng noh năm soh ăh anih nai dơ̆ng, kơyuơ noh gô vei sơđơ̆ng ƀiơ̆ mưh chă ƀôh unh sa, hăp ưh đei sa rok truh tơ̆ ‘long bri. Mă 2, pơm ăn teh hơ-iuch vă kon char kơmar tơ̆ hơla bri gơhc hă hơrih sa, ‘ngiĕt ‘lâ̆p kĕ hon giơ̆ng, kon bri brăh đei tơmam chă sa”

Atŭm hăm tơdrong jang tang găn unh sa, tŏk bŏk đei tơlĕch jang jâ̆p dêh char, rim anih jang vei lăng bri ‘long păng dôm tơ-‘ngla bri adoi tơrĕk truh tơdrong hơtŏk hơbĕch hơbal lơ̆m tơdrong pĭt unh sa bri. Ƀok Hồ Văn Lành, Phŏ Kơdră Anih jang vei lăng bri ‘long Krông Năng – Buôn Hồ ăn tơbăt, gơnơm đei tơdrong hơmet tơnăp găh bơngai jang adoi nhen tơmam drăm ‘măn ăn tơdrong jang tang găn păng pĭt unh sa tơ̆ tơring, ‘măng unh sa tơ̆ Tơring bri 299 lơ̆m săh Cư Klông apŭng Krông Năng, đei ƀôh ăh blŭng khei 4 âu, hlôi đei tơpăt keh kong: “Đơ̆ng rŏng băt đei unh sa, nhôn hlôi jang hadoi hăm Khul jang vei lăng bri ‘long chă tang găn păng pĭt unh sa bri kơsô̆ 3 (lơ̆m Anih jang găh Vei lăng bri ‘long Đăk Lăk), tơ-‘ngla bri păng jơnŭm pơgơ̆r tơring, chă hơvơn khul jang đei hloh 40 ‘nu akŏm pĭt unh sa. Tôm noh athei pơm kiơ̆ tơchơ̆t 4 tơ̆ tơring vă pĭt unh sa, hăm tơdrong adrin đơ̆ng đe ‘nhŏng oh noh unh đei tơpăt tơtom, ưh lê̆ đei tơdrong răm hli hlơt kiơ ôh”

Kiơ̆ kơ ƀok Nguyễn Quốc Hưng – Kơdră Anih jang Vei lăng bri ‘long dêh char Đăk Lăk, dang ei, pơhlom tong anê̆ hơgăt teh bri tơ̆ dêh char, hơtŏ pơhlom 237.000 ha tŏk bŏk ƀônh ƀơm unh sa hli hlơt. Lơ̆m noh 189.000 ha noh ƀônh unh sa păng hloh 48.000 ha noh ƀônh ƀơm unh sa hloh. Kơyuơ noh, khul jang vei lăng bri ‘long, rim tơ-‘ngla bri dăh mă Anih vei lăng kon pơlei rim săh tŏk bŏk oei akŏm lơ̆m tơdrong jang tang găn păng pĭt unh sa bri. Ƀok Nguyễn Quốc Hưng sơkơ̆t hơdăh:“Đơ̆ng rŏng kơ Têt nguyên đan truh dang ei, nhôn hlôi kơchăng tơlĕch pơm jang, đơ̆ng rŏng kơ noh tơlĕch jang truh dôm Anih jang Vei lăng bri ‘long tơ̆ apŭng, 3 Khul jang vei lăng bri ‘long kơchăng pơm jang atŭm hăm tơring, tơlĕch pơm jang tang găn păng pĭt unh sa bri. Mă kăl, lơ̆m khei tơm kơ pơyan phang blŭng khei 4 âu, Anih jang Vei lăng bri ‘long dêh char adoi akŏm Khul jang chă hơlen tơdrong pơjmang, pơgơ̆r rim anih iŏk jang găh bri tơ̆ dôm apŭng nhen: Ea Súp, Ea Kar, Mdrak, Cư M’gar, Buôn Đôn, Krông Bông, Lăk… athei vei sơđơ̆ng tơdrong jang tang găn păng pĭt unh sa bri. Nhôn adoi năm hơlen tơdrong hơmet dôm tơmam drăm, bơngai jang kơ dôm tơ-‘ngla bri vă tơjră hăm dôm tơdrong đei ƀôh unh sa bri, ‘noh athei đei trong jang pĭt unh sa bri mă tơtom hloi”.