Dak Lăk dang ei đei hloh 4.100 tong duk, lơ̆m ou 428 tong duk tih pran 90CV kĕ yak rôp ka hơdang tơ̆ tơring hơtăih đak dơsĭ. ‘Moi kiơ̆ 189 km jih đak dơsĭ, rơbou ŭnh hnam kon pơlei hơrih sa păng mơdro sa, jang tơmang pơhiơ̆ đak dơsĭ. Tŏk bŏk lơ̆m pơyan ‘mi kial hơbŭt hơbông, Khul bơ̆ jang păng kon pơlei dêh char Dak Lăk hlôi tơlĕch lơ trong jang tang găn ‘mi kial pơrăm, vei lăng sơđơng bơngai, mŭk drăm păng pơm dă ƀiơ̆ hiong răm choh jang sa. Bro tơring dơnŏk duk Vũng Rô, tơring Hòa Xuân Nam, dang ei đei 600 rơkĭ rong ka, 68 tong duk tih kơ kon pơlei rôp ka hơdang atŭm hăm dang 140 tong duk đơ̆ng rim dêh char hơnơ̆ng chô̆ kơ̆t tơ̆ ou. ‘Nou tơring bing kial, đei lăng jĭ hơnih veh ver ‘mi kial hơbut hơbông pơrăm sơđơ̆ng hloh. ‘Ngoăih bơ̆ jang vei lăng sơlam teh đak tơring đak dơsĭ, Khul ƀô̆ đô̆i vei lăng sơlam teh đak hơnơ̆ng iung jang hơdoi tang găn ‘mi kial pơrăm, tơgum kon pơlei rôp ka hơdang păng kon pơlei hơrih sa lơ̆m đak dơsĭ. Tơdrong iung jang đơ̆ng rim khul pơm dă ƀiơ̆ đei tơdrong, pơjing đei jơhngơ̆m đon lui yom kơtang vă kon pơlei hơnơ̆ng tơklep kơjăp hăm đak dơsĭ, tơgop vei lăng sơđơ̆ng pơm tơm kơdih păng atŏk tơ iung mŭk drăm tơring.