Đơ̆ng sơnăm 2017–2021, dêh char kăt tơjur đei hlŏh 7.400 ƀiên chê̆; đơ̆ng 2022–2026 tơjur dơ̆ng hlŏh 6.000 ƀiên chê̆. Bơ̆ jang kiơ̆ nơ̆r tơchơ̆t 121 păng Tơdrong tơchơ̆t 60, Đắk Lắk hơmet ming, tơjur 1 anih jang tơ̆ dêh char, 24 anih jang tơ̆ apŭng, 184 xăh kŭm hăm kơhrĕng anih jang, khul grŭp. Gơnơm thoi noh, tơdrong bơ̆ jang tơ̆ dôm anih jang, tơring tơrang roi tŏk ‘lơ̆ng, kơsô̆ bơngai pơm hla ar trŏ năr hơgăt đei hlŏh 98%, sơng iŏk pơm trư̆k tuyê̆n đei 75%. Hop akŏm đảng ƀô̆ jơ̆p tơring jăl jang ‘nao hlôi pơgơ̆r đang hrôih ƀiơ̆ 15 năr.

Pơma tơ̆ Hop akŏm Bí thư Đảng dêh char Đắk Lắk ƀok Nguyễn Đình Trung athei hơmet pơ ‘lơ̆ng tơdrong klăih song hơnăp jang, anih jang kơmăy kơmŏk roi tơbăt, pơm ‘lơ̆ng ăn dôm tơdrong hơgăt jang mŭk drăm, tơpôl, mă loi jĭ tơjur tơnuh hin gơh tơplih ‘lơ̆ng hơiă iŏk đơ̆ng tŏk bŏk jăl jang truh, tơdăh ưh ‘nŏh gô đei set hơlen, tơplih ming kăn ƀô̆.