Năr 19/5/2024 ‘noh mĭnh năr tôch gĭt kăl hăm Y Jer Kpor, hŏk tro lăm 12, hnam trương jăl pêng Nguyễn Bỉnh Khiêm, apŭng Krông Pach, dêh char Dak Lăk mưh đei pơma pơkăp tơ̆ hơnăp hla kơ Đảng. Y Jer Kpor tơbăt, hloh đơ̆ng hŏk pơhrăm găh Đảng, găh tơdrong jang ‘lơ̆ng kơ dôm đảng viên kĕch mang mĭnh jơhngơ̆m đon păng đei mơ̆t lơ̆m khul Đảng, Y Jer sa roi kơrŭn đĭ ai hloh dơ̆ng hŏk pơhrăm, đei jing kon pơlei ‘lơ̆ng, đảng viên yŭk trong hơlou vă tơgŭm ăn pơlei pơla:“Mă blŭng ‘noh ba sơnăm oei mơlôh, jĭ mĭnh đảng viên ‘nao, kơna ‘măng blŭng ‘noh ba hơdrin vă đei jing bơngai đảng viên ‘lơ̆ng, vă ning nai kai ning mônh chôt vih hăm pơlei pơla bơ̆n, tơgum atŏk tơ iung mŭk drăm, oei sa joh ayŏ, hŭt dôm tơdrong joăt joe pă gan trŏ lăp pơm ưh kơ ‘lơ̆ng hơ iă ăn pơlei pơla.”

Jei đei mơ̆t lơ̆m khul Đảng ƀlep lơ̆m jơ ‘năr tơbăt 134 sơnăm năr rơneh Ƀok Hô, mưh ‘nao pơlong mơ̆t hŏk lơ̆m hnam trương Đăi hŏk Kinh tế Hồ Chí Minh, Trần Phan Tường Vy ưh kơ kĕ kơ ôn jơhngơ̆m đon chơt hơ iă ‘nă hal. Tường Vy tơroi, tơdrong đei pôk tơmơ̆t lơ̆m khul Đảng tơgŭm ăn kơ ĭnh đei dơ̆ng jơhngơ̆m pran vă hơnơ̆ng hơdrin hŏk pơhrăm lơ̆m dôm sơnăm hŏk pơhrăm đăi hok truh ou kơnh.“Đei tơmơ̆t lơ̆m Đảng Cộng sản Việt Nam ‘noh ba hơdrin hloh dơ̆ng, tơnăp hloh dơ̆ng, jĭ bơngai đảng viên ba gô hơdrin hloh dơ̆ng, vă tơdrong oei sa, hŏk pơhrăm kơ ba ‘lơ̆ng hơ iă hloh, vă tơgŭm ăn kơ teh đak”

Kiơ̆ đơ̆ng kô pơtho Nguyễn Thị Mai Phương - Kơ iĕng Ƀĭ thư chi ƀô̆, Kơ iĕng kơdră vei lăng Hnam trương jăl pêng Nguyễn Bỉnh Khiêm, apŭng Krông Pach, dêh char Dak Lăk, dôm sơnăm tơjê̆ ou, bơ̆ jang atŏk tơ iung Đảng hăm đe hŏk tro đei hnam trương lăng kơjăp păng iŏk đei jơnei kơtang. Đơ̆ng sơnăm 2020 truh dang ei, hnam trương hlôi tơmơt lơ̆m khul Đảng đei 19 ‘nu hŏk tro hŏk hơgei oei sa ‘lơ̆ng:“Đơ̆ng sơnăm 2019 Hơnih bơ̆ jang Đảng apŭng hlôi pơtho tơbăt atŏk tơ iung đảng viên lơ̆m đe hŏk tro ‘noh chi ƀô̆ nhôn jei lăng tôch kơ dêh găh tơdrong ou păng nhôn pơlăp hăm mĭnh ‘nu hok tro vă ăn năm hŏk pơhrăm vă đei jing đảng viên lei rim đe hŏk tro ‘noh kăl hŏk hơgei, oei sa ‘lơ̆ng. Mưh ƀôh đei dôm hŏk tro ‘noh nhôn pơjao ăn Đoàn hnam trương chă pơtho pơhrăm păng ăn đe oh vang iung jang rim tơdrong vă ƀôh hơdăh hloh dơ̆ng dôm tơdrong hlôh vao, tơdrong hlă kơ đe oh.”

Jăl jang 2020 – 2025, Hơnih Đảng apŭng Krông Pach hơdrin pôk tơmơ̆t đei 100 ‘nu đảng viên lơ̆m rim hnam trương jăl pêng păng hnam trương pơtho tơdrong jang – Giáo dục thường xuyên. Jô̆ truh khei 6 sơnăm 2024, Hơnih Đảng apŭng Krông Pach hlôi tơmơ̆t đei 83 ‘nu đảng viên ‘nao ‘noh dôm bơngai hơgei oei sa ‘lơ̆ng tŏk bŏk hŏk pơhrăm rim hnam trương jăl pêng lơ̆m apŭng. Lơ̆m ou sơnăm 2023 tơmơ̆t đei 23 ‘nu hŏk tro; 6 khei blŭng sơnăm 2024 ‘noh đei 29 ‘nu hok tro đei pôk tơmơ̆t. Ƀok Trần Hồng Tiến - Ƀĭ thư Đảng apŭng Krông Pach, dêh char Dak Lăk tơbăt, tơdrong atŏk tơ iung đảng viên lơ̆m rim hnam trương hlôi tơgŭm pơjing đei lơ đảng viên sơnăm mơlôh tơ̆ apŭng. Mưh vang hop akŏm hơdoi lơ̆m khul đảng tơ̆ tơring pơlei đe oh đei khul kơdră đảng tơring hơnơ̆ng pơtho pơhrăm, chông ba vă đei jing dôm bơngai 'lơ̆ng hơ iă hloh dơ̆ng:“Atŏk tơ iung Đảng tơ̆ ou ưh khan lăp atŏk tơ iung ăn chi ƀô̆, ăn đảng ƀô̆ kơ apŭng mă lei oei atŏk tơ iung ăn Khul Đảng. Tơchă ăn khul Đảng dôm đảng viên gơh hơgei, đei jơhngơ̆m đon ‘lơ̆ng. Tơdăh dang ei bơ̆n tơchă đei dôm đe oh đoàn viên ‘lơ̆ng hơ iă, hŏk hơgei tơ̆ rim hnam trương vă pôk tơmơ̆t lơ̆m đảng, đơ̆ng rŏng ou kơnh tơƀăt ăn đe oh mơ̆t hŏk rim hnam trương Đăi hŏk vă hơnơ̆ng tơgŭm djru lei đei dôm đe oh sinh viên ‘noh bơngai đảng viên. Păng lăp đơ̆ng rŏng đe oh lĕch ‘măng khoă, mơ̆t jang lơ̆m rim hơnih bơ̆ jang teh đak ‘noh bơ̆n hlôi đei dôm bơngai đảng viên gơ̆h hơgei, ‘lơ̆ng hơ iă lơ loh.”

Tơdrong pơgơ̆r pôk tơmơ̆t đảng viên lơ̆m hnam trương jăl pêng tơ̆ apŭng Krông Pach, dêh char Dak Lăk mĭnh păh ‘noh tơchă ƀôh, hôn bơnê dôm tơdrong hơdrin kơ dôm đe hŏk tro hơgei oei sa ‘lơ̆ng, mĭnh păh pơjing đei rơvơn vă atŏk tơ iung Đảng lơ̆m khul mơlôh, tơgop pơm atŏk ‘lơ̆ng khul đảntg viên păng tơmơ̆t dơ̆ng khul jang ‘nao, ‘lơ̆ng, gơ̆h hơgei ăn kơ Đảng.