Năr 16/7, Jơnŭm vei lăng kon pơlei dêh char Dak Lăk jăl X, jăl jang 2021-2026 hlôi pơdrơ̆ng kiơ̆ trong tơlĕch jang, tơdrong vă jang atŏk tơ iung mŭk drăm-tơpôl, sơđơ̆ng teh đak, sơđơ̆ng tơring, hơdrin jang keh đang trong tơlĕch jang tŏk 8% lơ̆m sơnăm ou păng tơchơ̆t lơ tơdrong kăl vă hơmet pơ ‘lơ̆ng dôm tơdrong tơnap tap ăn Khul kơdră chĕp pơgơ̆r tơring ƀar kâp sơđơ̆ng, jơnei. 6 khei blŭng sơnăm, mŭk drăm-tơpôl dêh char Dak Lăk vei kơjăp hơyak tŏk hơ iă, iŏk đei jơnei 7%, akŏp kon jên thuê̆ ăn hơnih bơ̆ jang iŏk đei hloh 8.700 ti hlak jên, akŏp tĕch mơdro tơ̆ teh đak đe iŏk đei 1.520 triu USD… 6 khei hơtuch sơnăm, Dak Lăk hơdrin iŏk đei tŏk mŭk drăm 8,64%; tơjur ŭnh hnam dơnuh đơ̆ng 3% năm tơ̆ lơ ... Tơ̆ Hop akom, Jơnŭm vei lăng kon pơlei dêh char Dak Lăk hlôi lăng hơlen, tơchơ̆t pơdrơ̆ng kiơ̆ rim tơdrong tơchơ̆t: Hơmet ming trong vă tơlĕch kon jên bơ̆ jang tơring, hơmet ming trong pơprŏ tơmơ̆t jên jang teh đak; tơmơ̆t dơ̆ng kon jên kla ăn rim Tơdrong jang tơm teh đak; pơjing trong tơchơ̆t, tơdrong jang tơgŭm djru ăn kang ƀô̆, bơngai jang tơ̆ Hơnih bơ̆ jang ‘nao; tơchơ̆t kon jên ăn rim tơdrong jang joh ayŏ kơdŏ soang, pơtrŭt jang teh đak…

Kiơ̆ tơdrong tơchơ̆t mă Jơnŭm vei lăng kon pơlei dêh char Đắk Lắk ‘nao pơdrơ̆ng kiơ̆, kang ƀô̆, bơngai jang kơ teh đak păng bơngai jang găh dôm anih jang Đảng, Teh đak, Mặt trận Tổ quốc Việt Nam, dôm khŭl jang chĭnh trĭ - tơpôl đei pơjao hơnăp jang truh bơ̆jang tơ̆ anih bơ̆jang dêh char Đắk Lắk (đơ̆ng rŏng tơmơ̆t hơdai hăm dêh char Phú Yên) păng anih bơ̆jang tơ̆ xăh gô đei tơgŭm jên năm vih vơ̆t, jên thuê hnam păng jên tơgŭm 1 ‘măng. Mă hơdăh ‘noh, bơngai năm bơ̆jang tơ̆ anih bơ̆jang dêh char gô đei tơgŭm blŭng a 2 triệu hlak jên, păng rim khei tơgŭm 2 triệu hlak jên năm vih vơ̆t, 3 triệu hlak jên thuê hnam. Hăm bơngai bơ̆jang tơ̆ anih bơ̆jang tơ̆ xăh, jên tơgŭm đei jô̆ kiơ̆ trong năm vih vơ̆t hơtăih, đơ̆ng 500.000 hlak jên truh 2 triệu hlak jên 1 ‘nu 1 khei păng 1,5 triệu hlak jên 1 ‘nu 1 khei jên thuê hnam (tơdăh oei hơtăih hloh 30 km) păng 1 triệu hlak jên tơgŭm 1 ‘măng. Khei ‘năr bơ̆jang kiơ̆ tơdrong jang tơgŭm ‘noh 12 khei.