Hop akŏm ‘noh jĭ tơdrong hơiă gĭt kăl lơ̆m tơdrong roi tơƀôh tơdrong jang cheh phe Việt Nam pơma atŭm păng cheh phe Buôn Ma Thuột pơma hơdrô̆ tŏk ‘lơ̆ng ‘nao, yak truh cham pơ ngôi atŭm đơ̆ng anih jang cheh phe apŭng plĕnh teh. Hloh 400 ‘nu tang măt truh đơ̆ng Anih tơm vei lăng găh Kơmăy kơmŏk Mơdro sa; Jơnŭm jang Cheh phe Ca cao Việt Nam, dôm anih tơm, anih jang Trung ương; tang măt kơdră chĕp kơ̆l dôm dêh char, pơlei tơm; dôm bơngai tang măt, anih jang tang măt ăn dôm teh đak, khŭl jang, grŭp jang apŭng plĕnh teh păng dôm anih mơdro sa pơm tơlĕch cheh phe vang truh Hop akŏm. Pơma pơgơ̆r blŭng a Hop akŏm, ƀok Nguyễn Tuấn Hà - Phŏ Kơdră Anih vei lăng kon pơlei dêh char Dak Lak tơbăt, dang ei cheh phe kơ dêh char hlôi tĕch tơlĕch truh tơ̆ hloh 70 teh đak lơ̆m apŭng plĕnh teh, păng hlôi đei Anih tơm Khoa hŏk păng Kơmăy kơmŏk asong hla ar pơkăp hơdăh hơnih teh cheh phe Buôn Ma Thuột păng đei vei lăng tơgŭm tơ̆ 32 teh đak lơ̆m jơ̆p plĕnh teh.

Hop akŏm tơgoăt hơdai mơdro sa apŭng plĕnh teh ‘măng mă blŭng đei pơgơ̆r lơ̆m năr Lêh cheh phe Buôn Ma Thuột, sa roi sơkơ̆t hơdăh tơdrong hơdrin đơ̆ng Dak Lak ‘noh jĭ hơnhăk cheh phe Buôn Ma Thuột jing hơnih truh đơ̆ng cheh phe apŭng plĕnh teh. 10 hla ar biên bản chih tơƀlŏk drơ̆ng nơ̆r jang hơdai đơ̆ng dôm anih jang mơdro sa lơ̆m păng ‘ngoăih teh đak lơ̆m tơdrong jang cheh phe hlôi đei kĭ pơkăp tơ̆ Hop akŏm hơnơ̆ng pơih ăn dôm tơdrong hiôk mơdro sa ăn anih jang tơmam cheh phe, tơgop sơkơ̆t hơdăh kơjă cheh phe, tơmam đơ̆ng choh jang sa Việt hlôi păng tŏk bŏk yak hơ tăih, gơh đei truh tơ̆ dôm tơring teh ‘nao.