Yak hloh 120 sơnăm pơjing păng hơtŏk tơiung, Đắk Lắk dang ei đei hơgăt teh bri brăh, kơsô̆ kon pơlei găh grŭp dôm dêh char, pơlei tơm drơ̆ng hơdrol lơ̆m teh đak; mŭk drăm hơtŏk tơiung ‘lơ̆ng, pơvei tơdrong jang tŏk lơ jô̆ păh lăp đei 8% l sơnăm lơ̆m prăt 20 sơnăm kơ âu. Mă loi ‘noh, Đắk Lắk oei jing hơnih akŏm lơ tơdrong ‘lơ̆ng hơiă găh joh ayŏ so, tơdrong joăt oei sa ‘lơ̆ng hơiă đơ̆ng tơpôl 49 hơdrĕch hơdrŭng vang hơrih sa. Vang năm păng pơma hmach chơt hơiă kơ Đảng bộ, khŭl kơdră păng kon pơlei dôm hơdrĕch hơdrŭng dêh char Đắk Lắk, Phŏ Thủ tướng Nguyễn Hòa Bình athei dêh char Đắk Lắk kăl kơ hơvơn jơhngơ̆m pran akŏm, iŏk jang đei yua tơmam ‘lơ̆ng hơtŏk tơiung, tŭn pran jang tŏk; tơplih ‘nao tơdrong jang mŭk drăm, tơm ‘noh jĭ hơtŏk tơiung dôm tơmam đơ̆ng choh jang sa, tơmam bri ‘long lơ, ‘lơ̆ng, tĕch tơ̆ teh đak đe lơ; pơtrŭt tơdrong jang choh jang sa pơm tơlĕch tơmam đơ̆ng choh jang sa, bri ‘long, ka hơdang păng pơm tơlĕch ŭnh hơyuh rơgoh; pơjing khŭl jang chĭnh trĭ rơgoh, pran kơjăp, tơpăt, bơ̆jang ‘lơ̆ng, yua kơ kon pơlei pơvih pơvăn; hơtŏk tơiung mŭk drăm - tơpôl, vei lăng cham char, vei sơđơ̆ng tơdrong hơrih sa tơpôl; vei sơđơ̆ng teh đak păng sơđơ̆ng lơ̆m tơpôl.

Tơ̆ jơ pơm lêh, tang măt kơdră chĕp kơ̆l Anih tơm vei lăng găh Joh ayŏ, tơplŏng kơ dâu păng tơmang lăng hlôi roi tơbăt hơdăh Tơdrong tơchơ̆t păng pơjao Ƀăng drơ̆ng ăn Tơmam kăp gĭt kơ teh đak “Tơmam koer tơmo Thác Hai” ăn dêh char Đắk Lắk. Hơdai hăm ‘noh Anih jang găh tơdrong lơ, tih, ‘lơ̆ng hloh kơ teh đak kŭm pơjao 3 tơdrong ‘lơ̆ng lơ hloh kơ teh đak ăn dêh char Đắk Lắk ‘noh đei: Đắk Lắk jĭ dêh char đei teh să păng tơmam cheh phe lơ hloh Việt Nam; Dơnâu đak Lắk, apŭng Lắk, dêh char Đắk Lắk jĭ dơnâu đak ƀlăng să hloh tơring Tây Nguyên - Việt Nam; Pơgar bri ‘long teh đak Yok Đôn, dêh char Đắk Lắk đei bri kơdrơ̆ng să hloh Việt Nam./.