Kiơ̆ roi tơbăt tơ̆ Hop akŏm kơ Anih vei lăng kon pơlei dêh char Đắk Lắk pơgơ̆r ‘năr brei (8-9), truh ‘năr 28/8, lơ̆m dêh char ‘nao tơlĕch jên jang đei hloh 3.939 ti hlak jên tơmơ̆t jên jang teh đak sơnăm 2025, đei 1/3 trong tơlĕch jang. Dôm tơdrong jang tih nhen pơm trong gre kơdâu hrĕnh Khánh Hòa – Buôn Ma Thuột, trong tơ ter đak dơsĭ Phú Yên, anih jang kăl Hơnih mŭk drăm Nam Phú Yên, Hơnih kơmăy kơmŏk Hòa Tâm, tơnŏk Bãi Gốc… tă kơ tơƀơ̆p tơhlăk tơhlĭn găh pơm hla ar păng iŏk pơ ‘ngoăih teh. Lơ̆m kơ plăh ‘noh, lơ tơdrong jang ‘ngoăih kơ jên jang nhen hơnih akŏm tĕch mơdro - pơvih pơvăn, dôm hơnih tơmang lăng cham char bri brăh, hơnih kơmăy kơmŏk ‘nao kŭm hiơ̆ tơlĕch jang.

Tơ̆ hơnăp tơdrong ‘nâu, ƀok Tạ Anh Tuấn, Kơdră Anih vei lăng kon pơlei dêh char Đắk Lắk athei dôm anih jang, tơring athei tŭn hrĕnh tơdrong jang tơlĕch jên tơmơ̆t jên jang teh đak, lăng ‘nâu jĭ hơnăp jang tơm vă pơtrŭt jang tŏk. Dôm tơdrong tơhlăk tơhlĭn găh teh, hrŭ ‘mong, hla ar cham char, ming man athei đei akŏm hơmet pơ ‘lơ̆ng hloi lơ̆m khei ‘nâu. Mă loi ‘noh, Kơdră Anih vei lăng kon pơlei dêh char Đắk Lắk athei jang kơtang ưh kơ lê̆ dôm bơngai iŏk jang kơ kĕ tơrăn vang jang dôm tơdrong jang, veh ver tơdrong jang hiơ̆, hơtŏk jên jang, pơm tơ jur iŏk yua jên tơmơ̆t jang teh đak. Kŭm hăm athei tŭn hrĕnh tơlĕch jên jang teh đak, Anih vei lăng kon pơlei dêh char Đắk Lắk pơgơ̆r dăr hơlen, hơmet ming trong tơlĕch jên jang teh đak 2025, akŏm jên ăn dôm tơdrong jang tơm, kĕ tơlĕch jên jang lơ, hơmet ăn trong tơlĕch jang tơmơ̆t jên jang teh đak păh lăp khei ‘năr 2026 – 2030. Tơdrong tơm ‘noh pơm tơplih rơđăh lơ̆m jang hrĕnh dôm tơdrong jang tơm, tơgop bơ̆jang kiơ̆ tơdrong hơgăt jang tŏk hloh 10% jăl jang ‘nao.