Kiơ̆ tơroi đơ̆ng Anih jang vei lăng kon pơlei apŭng M'Drak, tơdrong man dơnâu mong đak Krông Pách thươ̆ng hlôi bơ̆t đang, mong đak ăh jê̆ đĭ khei 3/2023. Mă lei, truh dang ei pơtơm đei pơhlom 450 unh hnam lơ̆m kơsô̆ hloh 700 unh hnam lơ̆m tơring teh pơm dơnâu đak jăk truh anih oei kơsô̆ 1 păng kơsô̆ 2 tơ̆ apŭng Ea Kar. Lơ̆m kơsô̆ 250 unh hnam tam mă jăk, đei 28 unh hnam oei ăh hơla anih kơjung 483m kơ dơnâu đak, gô ƀơm lơ tơdrong hli hlơt mưh đei 'mi kial, đak lơ̆m dơnâu mong tŏk blai lâ̆p lơ tơring. Dôm unh hnam âu mă trŏ noh athei pơkăl jăk adrol kơ năr 30/3/2023, ăh 'măng mă 1, jăl  2 kơ tơdrong pơkăl iŏk teh hăm dôm unh hnam ưh đei pơm kiơ̆ tơchơ̆t iŏk teh vă pơm dơnâu mong đak. Atŭm hăm noh khŏm mă pơkăl 28 unh hnam oei ăh hơla anih kơjung 483m, Anih jang vei lăng kon pơlei apŭng M'Drak gô adrin hơvơn, tơroi tơbăt vă 'nhăk tôm unh hnam âu jăk đơ̆ng anih pơm dơnâu đak.