Đơ̆ng ‘năr 29/9 – 01/10, tơ̆ phường Buôn Ma Thuột, Đảng bộ dêh char Đắk Lắk pơgơ̆r Hop akŏm Bơngai tang măt ‘măng mă mônh, jăl jang 2025 – 2030. Vang truh Hop akŏm đei 449 ‘nu bơngai tang măt, dơ̆ng tang ăn hloh 137.000 đảng viên lơ̆m đĭ đăng Đảng bộ dêh char Đắk Lắk.

Hop akŏm jăl jang âu, Đắk Lắk pơjing Tơdrong tơchơ̆t hăm trong jang kăl “Tơgoăt pôm ƀơ̆r đon - Kon pơlei pơm tơm - jang tơpăt - Tŏk ‘lơ̆ng - Hơtŏk tơiung”, tơlĕch ăn tơdrong hơgăt mŭk drăm tŏk jô̆ păh lăp 10,5% lơ̆m 1 sơnăm, iŏk yua kơ̆l bơngai đei 153 triệu hlak jên 1 ‘nu lơ̆m sơnăm 2030, kơsô̆ ŭnh hnam dơnuh hin lơ̆m tơring kon kông jur dang 3% lơ̆m 1 sơnăm; tơdrong jang pơjing Đảng tơmơ̆t đơ̆ng 3-4% đảng viên lơ̆m 1 sơnăm, rim sơnăm đei hloh 90% anih jang Đảng, đảng viên đei hơlen lăng, proh hơmet đơ̆ng jang đang ‘lơ̆ng hơnăp jang tơ̆ kơpal...

Hơdai hăm tơdrong akŏm pơtôch jăl jang âu ki (2020 – 2025), tơlĕch ăn trong jang, hơnăp jang păng tơlĕch ăn tơdrong tơchơ̆t ăn jăl jang 2025-2030, Hop akŏm roi tơbăt hơdăh dôm tơdrong Tơchơ̆t đơ̆ng Anih tơm Chĭnh trĭ găh bơngai jang athei vang jang lơ̆m Khŭl chĕp kơ̆l Đảng bộ dêh char păng Khŭl chĕp kơ̆l Anih jang Đảng dêh char jăl jang 2025 – 2030. Tơ̆ ‘măng hop akŏm hơmet lê̆ hơdrol đơ̆ng Hop akŏm Đảng bộ dêh char Đắk Lắk pơgơ̆r lơ̆m kơsơ̆ 29/9, Hop akŏm drơ̆ng nơ̆r pôk Khŭl kơdră ‘noh đei 12 ‘nu păng 3 ‘nu vang jang Grŭp thư ký.