Năm truh tơring Mỹ Khương, săh Mỹ Tịnh An, apŭng Chợ Gạo, dêh char Tiền Giang, rim bơngai adoi băt truh ƀok Lê Văn Thủy, 58 sơnăm, minh đảng viên jang mir hơgei lơ̆m jâ̆p teh đak. Dang ei ƀok jĭ tơ-‘ngla pơgar să 1 hectar 8 sao pơtăm tơm gu ga ‘lơ̆ng. Ƀok Thủy ăn tơbăt, adrol ki, unh hnam ƀok pơtăm ƀa ưh đei yua lơ ‘noh tơplih pơtăm tơm gu ga hơkâu kok vă jê̆ 30 sơnăm kơ âu. Đơ̆ng sơnăm 2012, đei anih juăt jang pơtho pơm jang, ƀok pơtơm jang kiơ̆ tơchơ̆t Viet GAP păng Global GAP jang atŭm hăm Hơp tak săh Mỹ Tịnh vă ‘măn tĕch ăn teh đak đe.

Gơnơm pơnam lơ̆m pơm jang păng băt chă iŏk yoa kih thuơ̆t pơm jang noh pơgar tơm gu ga kơ unh hnam ƀok Thủy hơnơ̆ng đei lơ plei păng ‘lơ̆ng. Rim sơnăm, pơgar tơm gu ga âu đei plei 3 pơyan, pĕ đei đơ̆ng 50-60 tâ̆n. Tôm plei gu ga kơ unh hnam ƀok, đei Hơp tak săh Mỹ Tịnh An răt tôm hăm kơjă măt hloh lơ̆m tơring truh kơ minh ƀar rơbâu hlj minh kĭ. Pơyan phang sơnăm âu, pơgar gu ga ƀok Lê Văn Thủy ‘nao đei yoa 20 tâ̆n plei, tĕch hăm kơjă 22 rơbâu hlj 1 kĭ, ‘noh đei yoa 450 trĭu hlj. Ƀok Lê Văn Thủy tơroi:“ ‘Meh pơtăm kiơ̆ tơchơ̆t Global GAP, tơdrong kăp gĭt ‘noh ba athei tơplih trong pơm jang, athei hơlen truh tơdrong ‘lơ̆ng rơgoh tơmam drăm pơtăm đei, sơđơ̆ng ăn bơngai răt yoa. Dang ei bơ̆n athei pơm jang kiơ̆ tơchơ̆t rơgoh, lơ̆m pruih pơgang, săi phŏng noh athei yoa kơchơ̆t hưuh kơ, dôm tơmam sinh hŏk  vă ‘lơ̆ng ăn kơ teh, păng tơmam pơtăm đei adoi rơgoh ‘lơ̆ng trŏ hăm tơdrong ‘meh răt yoa đơ̆ng kon pơlei”.

Tơdrong tơgăl kơ pôk bơnê hăm đảng viên  Lê Văn Thủy ‘noh tơdrong hơbĕch hơbal lơ̆m pơm jang. Lơ̆m kơplăh lơ kon pơlei jang mir tơ̆ tơring luh lăh pơtăm gu ga hơkâu brê noh ƀok “tơguăt” hăm tơm gu ga hơkâu kok. Kơlih kiơ̆ kơ ƀok, hơdrĕch gu ga hơkâu kok âu ưh ƀơm pơrang păng tơ̆ tơring Mi, Châu Âu đe lăp gu ga âu hloh. Khei năr âu ki, mă plei gu ga tĕch ưh kơ hlot, kơjă tơjur re mă lei ƀok ưh đei lao đon, mă pơtoi asong pơtăm ƀenh lơ̆m pơgar. Ƀok Nguyễn Văn Nam, Kơdră Anih jang vei lăng kon pơlei săh Mỹ Tịnh An ăn tơbăt, ƀok Lê Văn Thủy jĭ minh đảng viên gơh hơgei lơ̆m tơdrong pơm jang tơ̆ tơring: “Ƀok Thủy pơtăm kiơ̆ tơchơ̆t VietGAP hăm Hơp tak săh, pơtăm kiơ̆ pơkăp vă jang noh plei ‘lơ păng ‘lơ̆ng. Dang ei tơdrong mă ƀok pơtăm kiơ̆ trong ‘noh gu ga đei plei lơ hloh. Mă 2, ƀok ruih đak hăm bec, lŭk lơ̆k pơgang ruih hloi, ưh kơ kăl chă pruih hăm kơƀĭnh ôh, noh jơhngơ̆m jăn pran, mong ƀiơ̆ jơ jang păng đei yoa lơ. Dang ei, mưh gu ga hơkâu kok đei kơjă 15 rơbâu hlj 1 kĭ noh sơđơ̆ng bơih ”.

Đơ̆ng jang pơtăm tơm gu ga tĕch tơlĕch, unh hnam ƀok Lê Văn Thủy hlôi tŏk pơdrŏng, rim sơnăm jang đei yoa pơhlom 1 ti 500 trĭu hlj. Sơnăm 2020, ƀok chơt hơ-iă đei Thủ tướng teh đak bơ̆n pôk ăn ƀăng hmach bơnê kơyoa tơdrong pơm jang hơgei. ‘Nguaih kơ noh, bơngai jang mir âu adoi đei TW Jơnŭm bơngai jang mir Việt Nam, Anih jang vei lăng kon pơlei dêh char Tiền Giang pôk ăn lơ ƀăng hmach bơnê kơyoa pơm jang hơgei lơ̆m Jơnŭm păng pơlong choh jang sa.

Ưh hơdrô̆ pơm jang hơgei mă đảng viên Lê Văn Thủy oei jang Kơdră Jơnŭm kon pơlei jang mir tơring Mỹ Khương, săh Mỹ Tịnh An. Khei năr âu ki, ƀok hăt hot hăm dôm tơdrong jang ‘mêm bơnat lơ̆m tơpôl tơ̆ tơring nhen, tơgŭm bơngai jang mir hin dơnuh, man gơng trong nơnăm. Kơdih po ƀok, hlôi akŏm đei 30 ‘măng plang pham ‘mêm kơ-eng. Ƀok Lê Văn Thủy tơroi:“Jĭ kon pơlei Việt Nam mă sơnăm vă tŏk jê̆ 60 bơih, đei pơm jang lơ̆m Đảng noh jĭ minh ai tih. Kơdih po inh, mă klui ră mă lei inh sơkơ̆t hơdăh đon jang chĭnh trĭ kơ po, băt kơ chăl pơgơ̆r, băt kơ Đảng, kơ Teh đak... lơ̆m khei năr oei hơrih, inh gô adrin tôm tơdrong kăl hloh ‘noh athei hơrih mă tơpăt jue, hơrih ăn unh hnam, pơlei pơla kueng ƀôt, tơpôl, hŏk pơhrăm păng pơm kiơ̆ đon bơnôh trong jang ‘lơ̆ng Hồ Chí Minh mă tơnăp, vă răk ăn tơdrong ‘lơ̆ng kơ kon mon kon sâu yuk ƀoi”.

Vă jê̆ 60 sơnăm mă lei đon bơnôh lăp kơ tơdrong pơm jang hăm tơchơ̆t pơtăm tơm gu ga tĕch ăn teh đak đe kơ bơngai đảng viên “bơngai jang mir”  Lê Văn Thủy adoi oei chơngăm. Ƀok ăn tơbăt, oei jơhngơ̆m pran noh ƀok oei pơtoi pơm jang hăm unh hnam, khŏm mă pơm pơdrŏng đơ̆ng tơm gu ga vă pơm trong ăn kon mon kon sâu yuk kiơ̆ vă pơm jang .