Tơring pơjei băl âu đei 10 dêh char (Dak Lak, Dak Nông, Lâm Đồng, Gia Lai, Kon Tum, Phú Yên, Khánh Hoà, Bình Định, Quảng Nam, Quảng Ngãi). Lơ̆m sơnăm 2022, tơdrong jang tŏk mŭk drăm đơ̆ng dôm dêh char lơ̆m tơring lơ ƀiơ̆ kơ sơnăm 2021, mă loi jĭ dêh char Khánh Hoà tŏk hlŏh 22%, Lâm Đồng tŏk hlŏh 12%, Quảng Nam tŏk hlŏh 11%... Thu mong jên ăn tĕh đak jô̆ păh lăp đơ̆ng dôm dêh char đei tôm păng lơ ƀiơ̆ kơsô̆ đei tơlĕch. 

Pơma tơ̆ hop akŏm, Thượng tướng Trần Quốc Tỏ, Phŏ Kơdră tơm vei lăng Công an, vei lăng tơring pơjei kơ dôm dêh char Tây Nguyên păng tơring tơter đak dơsĭ kơ Tơring Tŏk bŏk athei, dôm dêh char lơ̆m tơring pơjei băl tơrĕk hlŏh dơ̆ng truh tơdrong tơguăt tơring vă gơ̆h pơjing trong jang hrơ̆ch ‘lơ̆ng, mĭnh jơhngâm jang atŏk tơiung mŭk drăm tơ̆ dôm tơring. Athei adrin tơplih ‘nao tơdrong jang tơ̆ tơring, vă gơ̆h đei yoa hlŏh dơ̆ng, athei hơtŏk tơdrong jang hơdoi mă kơjăp, tơgŭm ăn tơdrong jang hơdoi, tơguăt jơ̆p tơring, pơma nuh găh trong jang tŏk mŭk drăm đơ̆ng dôm dêh char lơ̆m tơring.