Plei Trà Cong, xăh An Hòa (apŭng An Lão so) oei jê̆ jơ̆ng kông Gai. Tơ̆ kơpal kông đei lơ tơmo tih iĕ, tôch hơmơt hơlih mưh đei ‘mi tih đunh. Yă Nguyễn Thị Hoa, oei tơ̆ plei Trà Cong tơroi, yă păng lơ bơngai ƀôh lơ ‘măng teh, tơmo hơlih đơ̆ng kông pơm ăn trong yak hư pơchăh, chĭt găn trong: “Tơdăh hơlih 1 pôm tơmo tih ‘nŏh sư dui ba hloi lơ tơmo iĕ huŏng kiơ̆. Kơplăh ‘nŏh kon pơlei tơ̆ âu ưh kơ băt vă kơdâu, yak trong yơ. Krang kơjung ƀât lăp tơmo drŏl truh tơ̆ trong tih sŭng hloi, pơma kiơ lơ̆m pơlei âu.”

Yă Phạm Thị Lệ Thùy – Phŏ Kơdră vei lăng kon pơlei xăh An Hòa ăn tơbăt, Trà Cong jĭ 1 lơ̆m 6 pơlei tôch hơmơt đei teh hơlih, đei lơ anih vă hơlih tôch hơmơt. Tơring hlôi hơmet hiă trong pôk rĭ hnam, chông tơlĕch kon pơlei năm tơ̆ tơring sơđơ̆ng mưh đei nơ̆r khan hơdrol đei tơdrong krê hơmơt kơ teh hơlih: “Kiơ̆ đơ̆ng tơdrong krê thoi yơ, xăh gô jang kiơ̆ rim trong jang hlôi đei kĭ ăn vă pơm ‘lơ̆ng, đei tơdrong thoi yơ athei lĕch veh, chông kon pơlei năm truh tơ̆ anih sơđơ̆ng. ‘Nŏh jĭ dôm hnam trưng, anih jang ăn teh đak lơ̆m plei Xuân Phong Nam, plei Vạn Long, plei Vạn Khánh”

Hơdai hăm tơdrong krê kơ teh hơlih, 1,2 tơring groi kông tơ̆ găh Hơlĕch dêh char Gia Lai oei đei lơ tơdrong krê kơ đak lŏk tơjroh mưh đei ‘mi tih hai. Nhen thoi tơ̆ thong Nước Ói, găh thôn 1, xăh An Toàn. Lơ̆m pơyan ‘mi tih, đak tŏk tôch kơjung, ro tôch jăng; đei 1,2 tơdrong hlôi pơrăm truh tơ̆ bơngai. Vă găn lê̆ tơdrong krê hơmơt, adrol kơ pơyan ‘mi kial truh, khul kơdră tơring hlôi hơtâp kơƀang chih tơbăt, ăn khul dân quân, khul vei sơđơ̆ng tơ̆ pơlei gak, ưh ăn kon pơlei yak vih vât kiơ̆ trong tơ̆ âu mưh đak tih tŏk.

‘Nhŏng Đinh Văn Bằng – Bơngai pơgơ̆r thôn 1, xăh An Toàn tơroi: “Xăh đei khul dân quân gak, tơ̆ pơlei ‘nŏh đei khul vei lăng sơđơ̆ng păng 1 kơsô̆ tơdăm vang trư̆k, gak ƀât dôm thong đak đei tơdrong krê hơmơt. Roi tơbăt ăn kon pơlei pơm kiơ̆ mă ‘lơ̆ng trong tang găn ‘mi tih, đak lip, ưh gơ̆h ăn đe yak vih vât mưh đak tŏk tih.”

Ƀok Nguyễn Văn Vân – Phŏ Kơdră vei lăng kon pơlei xăh An Toàn ăn tơbăt, yoa hơnơ̆ng athei tơjră hăm tơdrong sar bar, xăh hlôi hơmet đei lơ khul, tơmam vă tơjră, dŏng tơgŭm ăn kon pơlei mưh đei tơdrong krê. Găh noh dơ̆ng, khul chĕp kơ̆l Đảng, Khul kơdră pơgơ̆r xăh An Toàn kŭm pơjing trong chông hơnhăk kon pơlei tŏk tơ̆ anih sơđơ̆ng ‘lơ̆ng mưh đei tơdỏng krê: “Xăh pơjing trong jang tôch kơchăng, mưh đei ‘mi kial ‘nŏh ăn khul jang truh gak. Mưh rim tơdrong ‘lơ̆ng bơih ‘nŏh pơgơ̆r kôch hơmet trong ăn gre kon pơlei kơdâu vih vât. Mưh teh, tơmo hơlih dêh ‘nŏh athei đei gre chưk hơmet, nhôn chă thuê gre đơ̆ng 1,2 anih jang vă chưk hơmet tơgŭm ăn kon pơlei, vei lăng ‘lơ̆ng ăn bơngai păng tơmam mưh yak vih vât tơ̆ trong âu.”

Mă tơpă ăn ƀôh, tơ̆ Gia Lai, tơdrong jang tang găn sar bar tŏ ‘mi kial kơnê̆ hơnơ̆ng đei tơlĕch jang kiơ̆ tơring. Tơring tơter đak krong Pa, đak krong Ayun dăh mă tơter dơnâu Ayun Hạ ‘nŏh năng kăl truh tơdrong chông tơlĕch kon pơlei đơ̆ng tơring đak lơ̆p, bơ̆ hơmet bơnơ̆ găn đak, vei lăng sơđơ̆ng ‘lơ̆ng dơnâu đak. Tơring tơter đak dơsĭ, dơnâu, đak krong tih ‘nŏh athei chă roi tơbăt hơdrol, vei lăng sơđơ̆ng ‘lơ̆ng trong nơnăm tơ̆ đak păng vei lăng ‘lơ̆ng anih rong ka hơdang. Kơplăh ‘nŏh, tơ̆ dôm xăh groi kông nhen An Hòa, An Toàn ‘nŏh pơ ‘nhŏ ăn dôm tơdrong jang chă hơlen năng anih ƀônh đei teh hơlih păng hơmet trong pôk rĭ hnam, chông tơlĕch kon pơlei mưh đei tơdrong krê. Tơjră hăm ‘mi kial tơ̆ Gia Lai yoa thoi noh ưh lăp vă tơjră hăm tŏ ‘mi kial kơnê̆ đĕch, mă oei athei vei lăng ‘lơ̆ng rim tơdrong krê tơ̆ tơring teh, thong đak kiơ̆ tơring hai./.