Đơ̆ng rŏng 3 xơnăm ƀơm pơrang jĭ COVID-19, Et yôk Ƀok Tơnơm Hùng Vương xơnăm Quý Mão đei dêh char Phú Thọ pơgơ̆r tơguăt hăm Giĕng Joh ayŏ - Tơmang pơhiơ̆ Teh Yă Ƀok Dơnơm xơnăm 2023 hăm lơ tơdrong ‘nao, tơbang đei um ai joh ayŏ kăp gĭt kơ tơring teh Yă Ƀok Tơnơm; atŭm hăm noh pơm trong hiôk ăn dôm tơring păng kon pơlei jâ̆p teh đak kơtă pơgơ̆r dôm tơdrong jang kăp gĭt chôt vih hăm tơm a hla chă, pôk bơnê kơ jơhngơ̆m plang đơ̆ng Yă Ƀok Tơnơm.

Lơ̆m mŭk drăm joh ayŏ kon pơlei, Đên Hùng păng ‘năr Yôk Ƀok Tơnơm Hùng Vương jing um pơtih kơ đon bơnôh băt ‘mêm kơ teh đak păng jơhngơ̆m pran tơguăt tơguăl tôm kon pơlei. Đon lui xoi ƀlŏk kơ Ƀok Tơnơm Hùng Vương hlôi jing um ai joh ayŏ, đon ‘lơ̆ng hơƀăp juăt jue kơ bơngai Việt Nam bơ̆n. Mă jang yă kiơ, pơm jang tơ̆ yơ, rim bơngai kon tơring teh Việt adoi ling weh kơ tơm a hla chă, ling weh kơ yă ƀok tơnơm hăm đon bơnôh kŭp yom, pôk bơnê. Xơnăm 2023, Et Yôk Ƀok Tơnơm Hùng Vương păng Giĕng Joh ayŏ - Tơmang pơhiơ̆ tơring Teh Yă Ƀok Tơnơm đei dêh char Phú Thọ pơgơ̆r đơ̆ng năr 20 - 29/4/2023 (dang đơ̆ng năr 1 - 10/3 xơnăm Quý Mão) tơ̆ pơlei tơm Việt Trì, Anih Tơmang pơhiơ̆ kơ hnưr hơrih Đên Hùng păng dôm apŭng, thĭ xăh lơ̆m dêh char.

Găh khôi xoi tơbeh đei dêh char Phú Thọ pơgơ̆r tơnăp grasia, ƀenh kơ đon bơnôh tơpôl, akŏm lơ̆m dôm tơdrong tơm: Xoi Yôk kơ Ƀok Tơnơm kơ teh đak Lạc Long Quân păng plang hlôt nhang ƀlŏk tơbăt kơ Yă Tơnơm Âu Cơ; Et yôk kơ Ƀok Tơnơm Hùng Vương păng plang pơkao tơ̆ Anih chih tơbăt “Ƀok Hô pơma dơnuh hăm kang ƀô̆, khul linh Tơm yuk hơlâu”; Lêh plang hlôt nhang tơ̆ dôm anih gru grua xoi ƀlŏk kơ ƀok Hùng Vương, dôm bơngai rơgei, đe yŏng linh mă đe ư-ang ăh chăl ƀok pơtao Hùng lơ̆m tơring teh kơ dêh char. Lêh plang hlôt nhang ƀlŏk tơbăt kơ dôm ƀok Pơtao Hùng tơ̆ dôm apŭng, pơlei tơm, tơring kơdrâ̆m lơ̆m dêh char.

Atŭm hăm dôm khôi xoi tơbeh juăt jue, dôm tơdrong et xa xơnăm âu đei lơ tơdrong 'nao, tơguăt kơjăp hăm tơmang pơhiơ̆, pơjing đei dôm tơdrong jang ăn Giĕng Joh ayŏ - Tơmang pơhiơ̆, tơbang um ai joh ayŏ kăp gĭt kơ tơring teh Ƀok Tơnơm. Hơdăh hloh noh tơdrong Pơtơm “Lêh akŏm Đên Hùng păng Giĕng Joh ayŏ - Tơmang pơhiơ̆ tơring Teh Ƀok Tơnơm xơnăm 2023” păng “Giĕng akŏm mŭk drăm joh ayŏ đon bơnôh đei UNESCO chih pơkăp” lơ̆m 20 jơ năr 21/4/2023 tơ̆ Cham akŏm Hùng Vương; Pơma đam apŭng plenh teh hơnăn “Hop akŏm tơmang pơhiơ̆, joh ayŏ, mŭk drăm păng tơdrong hơtŏk tơ-iung kơjăp xơđơ̆ng Việt Nam”; Tơdrong pơlong glơi đak păng pơdăh vơ̆r thŏng minh anih tơ̆ dơnâu đak Cham pơhiơ̆ Văn Lang; Pơlong kơdăh ƀơlŏng Kŭp Hùng Vương; pơlong teh ƀơlŏng dôm khul pran jâ̆p teh đak iŏk kŭp Hùng Vương; akŏm kơchơ Tơmang pơhiơ̆ Tây Ƀăk xơnăm 2023; Akŏm kơchơ pơdăh tĕch răt tơmam drăm tơring Đŏng Ƀăk - Phú Thọ xơnăm 2023; Pơlong Joh ayŏ 'Nhot xa Teh Ƀok Tơnơm; Akŏm trăi joh ayŏ păng Pơlong joh ayŏ kơdŏ xuang ăh 'năr Yôk Ƀok Tơnơm Hùng Vương.

'Nguaih dôm tơdrong akŏm joh ayŏ, tơplŏng kơdâu, tơmang pơhiơ̆ rim xơnăm, xơnăm âu oei pơgơ̆r dôm tơdrong kăp gĭt nai, tơguăt atŭm đơ̆ng dôm tơdrong joh ayŏ kră xơ̆ juăt jue păng 'nao dang ei gơh pơlan xă jâ̆p jang nhen: Pơdăh “Mŭk drăm joh ayŏ, tơmang pơhiơ̆ dôm tơring kơdrâ̆m Việt Nam”; Lêh akŏm ao tai đe hơ-ioh Việt Nam “Ling weh hăm tơm a hla chă”; pơdăh hơbăn ao tai kon pơlei Việt Nam; Pơlong jrot gre tang wang dôm kâu lak ƀô̆ Việt Trì pơih xă; akŏm khul famtrip “Hơyak tơdrong tơmang găh um ai tơring Tơmăn”… Kiơ̆ kơ noh, tơgŭm ăn tơmoi gơh hơlen băt khôi juăt Xoi tơbeh kơ Ƀok Pơtao Hùng păng dôm tơmam drăm tơmang pơhiơ̆ kăp gĭt tơguăt hăm joh ayŏ tơring Teh Ƀok Tơnơm.

Mă kăl, xơnăm âu dêh char  Phú Thọ pơtoi hơvơn, pơtrŭt rim unh hnam lơ̆m tơring teh kơ dêh char kơdih hơmet kơmang por 'nhot hăm tơdrong kŭp yom grasia, tơnŏ vă ƀlŏk tơbăt, pôk bơnê kơ Ƀok Yă Tơnơm kơ hơdrung hơdrĕch lơ̆m năr 10/3 âm lĭch. 'Năr et yôk Ƀok Tơnơm Hùng Vương năr 10 khei 3 âm lĭch rim xơnăm hlôi jing anih pơkă găh đon bơnôh grasia kơ rim kon pơlei teh đak Việt, ƀenh kơ um ai kăp gĭt joh ayŏ juăt jue băt 'mêm kơ teh đak, tơƀôh đon bơnôh hmach bơnê kăp gĭt hăm đe Ƀok Pơtao Hùng păng đe ƀok tơnơm hlôi akŏm jơhngơ̆m pơjing păng vei lăng teh đak; atŭm hăm noh hơmet pơ-'lơ̆ng tơdrong tơguăt tơguăl tôm kon pơlei Việt Nam lơ̆m tơ-iung pơjing păng vei lăng teh đak.