Tơdrong jang pơm trong găh Hơlĕch – trong ver kơ Trong gre 19, jăl kơdâu klĕch xăh Biển Hồ, tơlĕch jang đơ̆ng hơtuch sơnăm 2022 hăm kơsô̆ jên jang truh 1.325 ti, kơjung vă jê̆ 15km, dang ei oei bơ̆ jang “3 ka, 4 kip” ưh pơngơ̆t ‘năr tŏ ‘mi thoi yơ, khŏm jang đang adrol kơ ‘năr 19/12 sơnăm ‘nâu.

Kŭm hăm ‘nŏh, Gia Lai oei hơmet ăn 2 tơdrong jang gĭt kăl kơ teh đak ‘nŏh: Trong gre kơdâu hrĕnh Quy Nhơn – Pleiku păng trong gre treng kơdâu hrĕnh Bắc – Nam. Dêh char hlôi jang đang tơdrong pơtŏ hơlen teh, hơmet tơmam păng vă tơlĕch dang 11.000 ti hlak jên vă pơvih ăn tơdrong hrŭ ‘mong, chưk pơ ‘ngoăih teh, pơjing tơdrong ‘lơ̆ng ăn dôm tơdrong jang tih, vang tơgop tơguăt tơring păng tưk tơiung mŭk drăm kơjăp ‘lơ̆ng.