Đơ̆ng rŏng hlŏh 2 bơ̆ jang kiơ̆ Khul kơdră pơgơ̆r tơring 2 tăl, tơdrong sek tơlang, iŏk pơm hla ar kon pơlei tơ̆ dôm xăh - phường kơ dêh char Gia Lai iŏk đei lơ tơdrong ‘lơ̆ng. Hơdrô̆ hăm 1,2 xăh, phường tơ̆ tŏk bŏk, Anih vei lăng kon pơlei dêh char Gia Lai athei jăh pơjing Anih pơm hla ar ăn tơpôl kơ dih vă bơ̆ jang roi đei yoa ‘lơ̆ng. 

Kiơ̆ Anih vei lăng kon pơlei dêh char Gia Lai, dôm Anih pơm hla ar ăn tơpôl tơ̆ xăh lơ̆m dêh char oei bơ̆ jang tôch đei yoa, pơm đang hla ar trŏ năr pơkă hlŏh 95%. Ƀok Lâm Hải Giang, Phŏ Kơdră vei lăng kon pơlei dêh char Gia Lai tơroi, hô sơ, hla ar teh pơm tam mă đang lơ ƀiơ̆ kơ dôm hla ar nai, tam mă pơm lăp hăm tơdrong ‘mĕh vă đơ̆ng kon pơlei, mă loi tơ̆ dôm phường tŏk bŏk. Atŭm hăm ‘nŏh, athei dôm xăh phường oei đei tơdrong ‘nâu jăh pơjing dơ̆ng Anih pơm hla ar ăn tơpôl kơdih vă hơnhăk tơdrong pơvih, pơm hla ar truh jê̆ ƀiơ̆ hăm kon pơlei, tơjur biơ̆ jơnăr păng jên huach đơ̆ng chă vih vât.