Đơ̆ng rŏng kơ hơmet ming, Đảng ƀô̆ dêh char Gia Lai dang ei đei 74 anih jang đảng hăm hlŏh 10.800 ‘nu đảng viên. Hơlen năng rim tơdrong jang đei păng dôm tơdrong tam mă pran ‘lơ̆ng lơ̆m jăl jang âu ki, Hop akŏm tơlĕch đon pơhnŏng jang tŏk lơ̆m jăl jang 2025-2030. Lơ̆m noh, jang tŏk GRDP jô̆ păh lăp rim sơnăm đei hlŏh 10%; iŏk yoa jô̆păh lăp kiơ̆ kơ̆l bơngai sơnăm 2030 đei hlŏh 6.300 USD, lơ̆m dêh char ưh pă đei unh hnam tơnuh; Akŏm đĭ đăng jên thu mong ăn teh đak truh sơnăm 2030 đei hlŏh 41.000 ti păng jên tĕch mơdro tơmam tơ̆ teh đak đe đei hlŏh 17 ti USD.

Vă jang đei tơdrong ‘nâu, Đảng ƀô̆ dêh char Gia Lai chih hơdăh 5 tơdrong tơm vă jang tŏk đei: Akŏm ăn tơdrong jang kơmăy pơm tơlĕch tơmam, jang kơmăy unh hơyuh rơgŏh, kơmăy kơmŏk ‘nao, kơchơ̆t bán dẫn păng AI. Hơnhăk chă tơmang lăng jing tơdrong jang mŭk drăm tơm ‘moi kiơ̆ tơdrong ‘lơ̆ng đơ̆ng đak dơsĭ, bri kông, jŏh ayŏ kơ dŏ xoang. Năm truh choh jang xa hăm kơmăy kơmŏk 'nao, jang ‘long kơjăp 'lơ̆ng, pơjing đei dôm tơring juăt choh jang xa hăm kơmăy kơmŏk xă. Pơjing lơ anih logistics tơter trong gre 19 păng trong gre kơdâu hrĕnh Quy Nhơn - Pleiku. Pơjing tơring kơdrâm hrĕnh păng kơjăp 'lơ̆ng, tơklep hăm teh tơmam, hnam oei.

Ƀok Hồ Quốc Dũng, Kơdră jang lơ̆m Trung ương Đảng, Bí thư Đảng dêh char Gia Lai athei Đảng ƀô̆ Anih vei lăng kon pơlei dêh char hơtŏk đon jang tơnăp, mât 1 jơhngâm, tơplih ‘nao, tơplih ming đon tơchĕng, jang mă pran khŏm yak hlŏh rim tơdrong pơmat tat, pơlong nol. Akŏm jơhngâm bơ̆ jang 6 tơdrong jang kăl. Lơ̆m noh, athei hơtŏk tơdrong roi tơƀôh ăn Anih chĕp kơ̆l Đảng dêh char, Khul kơdră chĕp kơ̆l Đảng dêh char găh atŏk tơiung mŭk drăm, tơpôl, vei sơđơ̆ng teh đak păng mât jang hơdoi hăm apŭng plenh teh; ƀôh hơdăh dôm tơdrong “oei tơhlăk”, “găn trong” vă đei trong hơmet ming; tơlĕch jên jang kơ teh đak mă ‘lơ̆ng, sơng iŏk jên tơmât jang đơ̆ng anih jang kơdih, hơtŏk tơdrong jang hơdoi teh đak hăm kon pơlei; tưk tơiung trong nơnăm, anih jang mă ‘lơ̆ng, tơguăt tơring; tơplih ming trong jang tŏk tơklep hăm jang mŭk drăm rơgŏh, jang hơdoi kơjăp ‘lơ̆ng, jang mŭk drăm kơsô̆; atŏk tơiung choh jang xa hăm kơmăy kơmŏk ‘nao, kơmăy pơm hơmet tơmam, unh hơyuh rơgoh, chă tơmang lăng, vei lăng ‘lơ̆ng tơdrong arih xa tơpôl, hơtŏk tơdrong  arih xa ăn kon pơlei, mă loi jĭ tơ̆ tơring kon kông, tơring hơtăih yăih.

Bí thư Đảng dêh char Gia Lai Hồ Quốc Dũng pơma hơdăh: “Athei Khul chĕp kơ̆l Đảng lơ̆m Anih vei lăng kon pơlei dêh char jăl ‘nao jăh hlôh vao, jang kiơ̆ ‘lơ̆ng tơdrong tơchơ̆t đơ̆ng Hop akŏm truh hăm rim kăn ƀô̆, đảng viên păng kon pơlei, pơjing tơdrong jang mă hơdăh, trong jang mă ‘lơ̆ng kiơ̆ rim tơdrong vă jang. Chih hơdăh jơnăr păng jên tơmam vă jang, pơjing trong pơgơ̆r jang, dăr hơlen, athei bơ̆jang, tơtom hơmet pơ ‘lơ̆ng dôm tơdrong oei tơhlăk, pơm ‘lơ̆ng vă tơdrong tơchơ̆t jăh mât lơ̆m tơdrong arih xa, pơm tơplih ‘lơ̆ng đơ̆ng dôm năr blŭng, khei blŭng, jăl khei mă blŭng kơ jăl jang hloi”.

 Hăm tơdrong juăt mât 1 ƀơ̆r đon, ‘mĕh jang tŏk, đon kơchăng tơplih ‘nao păng bơ̆ jang pran, Đảng ƀô̆ Anih vei lăng kon pơlei dêh char Gia Lai vă hơtŏk hơnăp jang tơm, năm hơdrol lơ̆m tơdrong hơmet ming, jang hăm kơmăy kơmŏk ‘nao tơ̆ anih vei lăng; adrin jang đang ‘lơ̆ng rim tơdrong đei tơlĕch đơ̆ng Tơdrong tơchơ̆t Hop akŏm jăl jang đơ̆ngng 2025 - 2030, vang tơgop pơjing dêh char Gia Lai jang tŏk pran kơjăp, rơgŏh ‘lơ̆ng, jing dêh char đei ƀôh lơ̆m teh đak./.