‘Măng thi THPT tĕh đak sơnăm ‘nâu, lơ̆m dêh char Gia Lai đei hlŏh 15.200 ‘nu hŏk tro chih măt thi; lơ̆m nŏh đei vă jê̆ 14.300 ‘nu hŏk tro hŏk phổ thông, 483 ‘nu hŏk tro hŏk ƀô tŭk, oei đei ‘nŏh bơngai năm chih măt năm thi đơ̆ng kơdih. Lơ̆m kơsô̆ hŏk tro chih măt vang thi đei hlŏh 14.000 ‘nu hŏk tro chih măt set điêm mât hŏk đăi hŏk, cao đẳng.

Hơmet ăn ‘măng thi âu, dêh char Gia Lai hlôi tơlĕch trong pơjing 41 anih thi tơpă (tŏk 1 lăm thi pơtêng hăm sơnăm 2022) păng 17 anih thi đei hơmet hiă, hăm 652 lăm thi, krao akŏm dang 2500 ‘nu kăn ƀô̆, thây kô, bơngai jang vang jang lơ̆m dôm khul pơgơ̆r, vei lăng thi. Ƀok Nguyễn Văn Long, Phŏ Kơdră Anih vei lăng pơtho pơhrăm dêh char Gia Lai ăn tơbăt, dang ei, Anih vei lăng hlôi pơtho ăn dôm hnam trưng jăh pơgơ̆r pơtho pơhrăm mă kĕh tơdrong hŏk phổ thông kiơ̆ nơ̆r hơgăt.