Lơ̆m jăl I sơnăm 2023, atŏk kơtang tơmam drăm tơ̆ Gia Lai iŏk đei 5,91%, thuê̆ ăn hơnih bơ̆ jang dêh char iŏk đei vă jê̆ 1.700 ti hlak jên. Kơjă rim hơnih choh jang sa-bri ‘long, jang kmăi kmŏk păng tĕch mơdro jei iŏk đei jơnei ‘lơ̆ng.

Mă lei, đĭ jăl I, Gia Lai tơlĕch kon jên jang teh đak ‘nao jơnei vă jê̆ 6% kơ yuơ tơhlăk tơhlĭn lơ̆m iŏk tơvih teh, pơm hla bơar hiơ hiơ̆ vă tơlĕch jang kiơ̆ tơdrong vă jang; tơdrong pơm glăi khôi luơ̆t vei lăng atŏk tơ iung bri oei hơnơ̆ng. Tơ̆ hop akŏm, ƀok Trương Hải Long- Kơ iĕng Kơdră chĕp pơgơ̆r Đảng dêh char, Kơdră chĕp pơgơ̆r Hơnih vei lăng kon pơlei dêh char Gia Lai athei rim hơnih bơ̆ jang păng tơring akŏm hơmet pơ ‘lơ̆ng tơnap tap, jang kiơ̆ ‘lơ̆ng rim tơdrong jang hơmet pơ ‘lơ̆ng mŭk drăm, 3 tơdrong jang Tơm Teh đak păng rim tơdrong jang, tơdrong tơchơ̆t đơ̆ng Dơnŏ anih Đảng dêh char.