Tơ̆ hop akŏm, dôm nơ̆r tơgop akhan, tơring Tây Nguyên đei dôm tơdrong ‘lơ̆ng hơdrô̆, mă loi ‘noh jĭ dôm tơdrong găh jơ hnơr arih, kon pơlei năm mơ̆t oei kư̆ kă, jĭ tơring đei lơ bơngai kon kông, teh choh jang sa lơ hloh... Yua thoi noh, tơ̆ 1,2 tơdrong athei hơgăt mă hơdăh păng ‘nĕ kơ hơdrom băl hăm dôm luơ̆t nai. Mă loi ‘noh jĭ vei lăng teh choh jang sa, mir đak lar, trong jang tơgŭm teh ăn kon pơlei kon kông, hơgăt kơ jă teh ƀlep hăm anih tĕch mơdro, Phŏ kơdră Anih tơm vei lăng găh tơmam drăm păng  cham char Lê Minh Ngân tơbăt, truh dang ei, dôm dêh char pơlei tơm lơ̆m teh đak hlôi tơlĕch Trong vă jang iŏk nơ̆r tơgop đơ̆ng kon pơlei hăm Luơ̆t teh ( hơmet ming). Lơ tơring tơlĕch jang truh tơ̆ xăh.

Kiơ̆ kơ ƀok Lê Minh Ngân, Anih tơm vei lăng găh tơmam drăm păng cham char gô tơtĕnh gơih hla tơroi tơbăt akŏm iŏk nơ̆r tơgop đơ̆ng kon pơlei găh Luơ̆t đơ̆ng rim tơring, Anih tơm, anih jang ăn Anih vei lăng Mŭk drăm, Anih jang Khôi luơ̆t kơ Kuôk hô̆i găh tơdrong chih iŏk, tơblang hơdăh nơ̆r tơgop đơ̆ng kon pơlei ăn anih chih hơmet ming.