‘Măng ăn năm bơ̆jang âu đei 11 ‘nu bơngai jang teh đak đơ̆ng dôm anih jang, năm bơ̆jang tơ̆ 11 xăh lơ̆m tơring păih Pơmơ̆t dêh char. Kiơ̆ tơdrong Tơchơ̆t đơ̆ng Anih vei lăng kon pơlei dêh char Gia Lai, khei ‘năr bơ̆jang tơ̆ xăh đơ̆ng dôm bơngai jang teh đak đei ăn bơ̆jang ‘noh đơ̆ng 3 truh 6 khei.

Lơ̆m khei ‘năr bơ̆jang tơ̆ tơring, bơngai jang teh đak athei hơnơ̆ng roi tơbăt rim giĕng, roi tơbăt akŏm hơtuch ‘măng, hơdai hăm vang pơtho pơhrăm bơngai jang kơtă hơnih, tơgop hơtŏk ‘lơ̆ng tơdrong jang vei lăng tơ̆ xăh. Kiơ̆ kơ Bí thư Anih jang Đảng dêh char Gia Lai Hồ Quốc Dũng, tơdrong tơchơ̆t âu ‘noh jĭ hơyak hơdăh vă bơ̆jang kiơ̆ Pơtôch đơ̆ng Anih tơm Chĭnh trĭ găh tŭn pran tơlĕch jang khŭl kơdră chĕp kơ̆l tơring 2 tăl, hơtŏk ‘lơ̆ng đei yua tơdrong jang đơ̆ng khŭl jang chĭnh trĭ tơ̆ tơring.