Đơ̆ng rŏng 1 khei bơ̆ jang kiơ̆ trong Khul kơdră pơgơ̆r tơring 2 tăl, 135 xăh, phường kơ dêh char Gia Lai hlôi hơmet ‘lơ̆ng anih jang, khul bơngai jang, lơ tơdrong hơgăt jang mŭk drăm hlôi jang đei jơnei ‘lơ̆ng. ‘Moi kiơ̆ đơ̆ng noh, dêh char tơlĕch đon pơhnŏng jang tŏk lơ̆m 6 khei hơtuch sơnăm hlŏh 7%.

Vă jang đei tơdrong ‘nâu, dêh char pơjao ăn 77 xăh, phường găh Pơmât, păih dêh char Gia Lai so dôm tơdrong hơgăt jang mŭk drăm, tơpôl, vei lăng, tơproh trong jang. Dôm tơdrong hơgăt âu đei chih hơdăh jing 23 tơdrong jang. Anih vei lăng kon pơlei dêh char Gia Lai athei dôm tơring jăh chih pơjing trong jang tŏk mŭk drăm, tơpôl lơ̆m 6 khei hơtuch sơnăm.

Hơdai hăm ‘nŏh, hơnơ̆ng pơjing Khul kơdră tơring bơ̆ jang pran kơtang đơ̆ng vei lăng jing pơvih pơvăn, pơjing tơdrong hiôk hian, hơdai hăm hơmet ming trong pơm hla ar, jê̆ kon pơlei păng sek tơlang ‘lơ̆ng rim tơdrong ‘mĕh vă tôch tơgăl đơ̆ng kon pơlei, anih tĕch mơdro. Dêh char vă tơmât jên răt dơ̆ng tơmam, kơmăy kơmŏk păng pơtruh bơngai jang lăp ‘lơ̆ng ăn dôm Anih pơm hla ar ăn tơpôl tơ̆ xăh, phường. Lơ̆m dôm tơdrong jang kăl, dêh char vă pơgơ̆r ăn lơ khul jur jang tơ̆ tơring vang hơmet pơ ‘lơ̆ng dôm tơdrong pơmat tat.