Huơ̆r gre choh chơ kon pơlei plei Kloong rok trong ƀê tŏng ƀrŏk tơ̆ pơlei năm klĕch lơ pơgar điêu, pơgar kơsu jing ‘lơ̆ng, Puih Thái tơbăt, rŏ lăng Têt âu ‘noh têt chơt hơiă hloh, yua kơ sư mơn ƀôh đei tơdrong sơđơ̆ng kăp gĭt păng jơhngơ̆m ‘mêm kơ eng đơ̆ng ŭnh hnam, pơlei pơla. PuihThái tơroi: Vă jê̆ 1 puăt sơnăm đei tơgŭm ƀrŏk tơ̆ hnam đơ̆ng rŏng khei ‘năr đei đe hơlĕnh tĕch tơ̆ Campuchia, bre ‘nhŏng oh Puih Thái, Puih Đại hơnơ̆ng đei tơdrong bơngơ̆t truh, pơlung đơ̆ng khŭl linh vei lăng tơring sơlam, khŭl kơdră tơring. Păng vă lăp hăm tơdrong bơngơ̆t ‘noh, bre ‘nhŏng oh Thái-Đại ling lang hơdrin hơdai hăm ŭnh hnam năm tơ̆ mir , pơnam kơ jang sa. Đại tơroi, hlôi têt sư gô rong thim pơbe vă tơplih ‘lơ̆ng iŏk yua păng nôp hla ar apĭnh jang kŏng nhân kơ su vă đei jên khei rim khei tơgŭm ŭnh hnam yua kơ sư đĭ hlôi rơđăh, dôm nơ̆r pơkă găh tơdrong jang hơiơch jên khei lơ tă kơ ôn lê̆ dôm tơdrong vă pơm kơnê̆:

“Đơ̆ng rŏng kơ ƀrŏk tơ̆ hnam, ĭnh hlôi hlôh đei ưh kơ đei tơdrong jang hơiơch jên khei lơ. ‘Noh lăp jing 1 tơdrong hơlĕnh pơdăr đĕch. Ĭnh hmach dêh yua kơ mơ̆ng kiơ̆ nơ̆r bơngai kơnê̆, lê̆ ŭnh hnam bơngơ̆t, hoach jên tơmam. Dang ei ĭnh ưh kơ năm tơyơ bơih, lăp hơdai hăm ŭnh hnam jang tơ̆ mir, hơtŏk tơiung mŭk drăm, bơngơ̆t ăn tơdrong arih sa tơ̆ hơnăp kơnh đĕch.”

Puih Phú, rơneh sơnăm 2005, tơdăm tŏ sĕt sơnam hloh lơ̆m grŭp hơdruh tơdăm đei tơgŭm đơ̆ng Campuchia ƀrŏk tơ̆ plei Kloong lơ̆m sơnăm 2022 tơbăt, dôm năr vă jê̆ têt, tơdrong jang mir roh đĭ đang đĭ bơih. Sư tŏk bŏk hơdai hăm đe hơdruh tơdăm lơ̆m pơlei chong hơmet ‘nhĕt tơter trong, hơmet rơgoh hnam hŏk hôp tơpôl vă kon pơlei đei hơnih tôn chĭng chêng, hơsoang păng ngôi pơchơt lơ̆m dôm năr sơnăm ‘nao. Phú tơchĕng vă jang, hlôi têt, sư gô yua kơsô̆ jên 18,5 triệu hlak jên mă khŭl linh vei lăng tơring sơlam tơgŭm vă năm tơ̆ thị trấn apŭng hŏk tơdrong jang hơmet gre păng dôm kơloăi kơmăy kơmŏk:

“Truh sơnăm, ĭnh gô hŏk tơdrong jang hơmet gre. Athei đei tơdrong jang ‘noh mă sơđơ̆ng đei tơdrong arih sa. Ƀơ̆t rơhơi, ĭnh jang mir hăm ŭnh hnam, hơtŏk jang sa, rong thim kon tơrong vă vei sơđơ̆ng tơdrong arih sa.”

Plei Kloong sơnăm 2022 hlôi tơplih tơtĕnh gơnang đơ̆ng tơlĕch jang tơdrong jang pơjing tơring tơrang ‘nao. Vă đĭ đăng dôm trong glung tơ̆ pơlei hlôi đei pơm hăm ƀê tŏng ‘lơ̆ng, trong ŭnh điên hlôi đei truh tơ̆ kueng ƀôt; hnam trưng mẫu giáo, jăl 1 lơ̆m pơlei đei pơm hơmet ‘lơ̆ng, rơgoh. Lơ ŭnh hnam jang sa đei ƀôh hlôi pơ̆n man hnam ‘nao kơjăp ‘lơ̆ng. Kiơ̆ kơ kră pơlei Rơ Chăm Choak, kŭm hăm dôm tơdrong jang trong nơnăm, ŭnh điên, hnam trưng hŏk, kon pơlei plei Kloong dang ei kŭm jang sa ƀônh ƀiơ̆ kơ hơdrol sơ̆ gơnang đơ̆ng tơdrong pơtho, pơhrăm găh khoa hŏk – ki thuơ̆t choh jang sa ăn kon pơlei đei pơgơ̆r hơnơ̆ng. Kon pơlei hlôi tơplih hơdrĕch ‘long pơtăm, kon tơrong păng hơtŏk ‘lơ̆ng đei iŏk yua jang sa. ‘Ngoăih kơ tơdrong đei iŏk yua đơ̆ng jang kŏng nhân kơsu, kon pơlei oei hơtŏk tơiung đei kơhrĕng hek tar ‘long kăp gĭt đunh năr nhen điêu, cheh phe păng kơsu.

Kră pơlei Rơ Chăm Choak lui akhan, tơdăh khŭl mơlôh lơ̆m pơlei hơdrin hŏk pơhrăm, pơnam kơ jang, plei Kloong gô hơtŏk tơiung tơtĕnh hloh dơ̆ng:

“Lơ̆m dôm ‘măng hôp pơlei, kră pơlei ‘meh vă kon sâu kơchăng, ‘nĕ kơ mơ̆ng kiơ̆ nơ̆r đe hơlĕnh pơdăr; hơdrin hơtŏk tơiung păng sơđơ̆ng mŭk drăm lơ̆m ŭnh hnam vă đơ̆ng rŏng âu kơnh oei bơngơ̆t ăn tơ̆ hơnăp. Kră pơlei gô jang hơdai hăm rim khŭl jang, anih jang pơtho akhan jơhnơr mơlôh lơ̆m pơlei năm ƀlep trong. Tơ̆ plei Kloong, ‘meh klăih đơ̆ng dơnuh hin ‘noh akŏm jang mŭk drăm ŭnh hnam mă đei iŏk yua.”

Ƀok Siu Nghiệp- Phŏ Bí thư anih jang Đảng, Kơdră chĕp kơ̆l Anih vei lăng kon pơlei xăh Ia O, apŭng Ia Grai pơma hơdăh, hơdruh tơdăm dôm pơlei tơ̆ tơring sơlam Ia O dang ei hlôi gơh sơđơ̆ng pơm pơdrŏng lơ̆m pơlei pơla kơdih bơ̆ih:

“Anih vei lăng kon pơlei xăh pơjao ăn Phŏ kơdră chĕp kơ̆l vei lăng găh joh ayŏ tơpôl tơlĕch jang dôm tơdrong jang tơroi tơbăt ăn kon pơlei kơchăng hăm tơdrong hơlĕnh pơdăr tơ̆ trong sơlam, tơ̆ mạng tơpôl; tơroi tơbăt bơngai jang ‘noh athei đei hơnih rơđăh, ƀlep bơngai, tơdrong jang. Kon pơlei hlôi băt đei tơdrong ‘nâu, jang ‘lơ̆ng tơdrong jang tơƀôh trong vă jang sa.”

Hăm tơdrong hơdrin đơ̆ng khŭl kơdră păng tơdrong 1 ƀơ̆r đon drơ̆ng nơ̆r đơ̆ng kon pơlei lơ̆m jang sa, um ai tơring tơrang tơ̆ tơring sơlam Ia O tŏk bŏk roi ‘năr roi tơplih ‘lơ̆ng. Tơdrong ‘nâu ‘noh jĭ tơdrong ‘lơ̆ng kơjăp vă dôm plei Jrai tơring ‘nâu đei tơdrong arih sa roi ‘năr roi ‘lơ̆ng hơiă hloh, vang pơjing đĭ đăng kon pơlei vei lăng kơjăp tơ̆ tơring sơlam teh đak.