Kon pơlei tơ̆ thôn 1, xăh Hà Tam, apŭng Đăk Pơ iŏk pơkăp vei lăng jê̆ 260 ha bri đơ̆ng Jơnŭm jang vei lăng bri hơmŏ Ƀăk An Khê. Lơ̆m dôm năr kơ khei 3, tô̆ pơđang pơdui đunh pơm ăn dôm tơring bri tơ̆ âu đei lơ ‘nhĕt kro, ‘nhĕt uh ƀônh ƀơm unh xa. Vă kơchăng tang găn, xăh Hà Tam hlôi akŏm khul vei hơlen, axong lơ anih hơlen vei lăng bri. Mă kăl, anih jang pơkăp chă akŏm xoh rơm rĕk lơ̆m lơ ha tơ̆ dôm tơring tơm ƀônh ƀơm unh xa. Ƀok Phạm Đông Mạnh, tơ̆ thôn 1, xăh Hà Tam, apŭng Đăk Pơ, unh hnam iŏk vei lăng bri ăn tơbăt: “Rim khul vei lăng đei đơ̆ng 2 truh 3 ‘nu chă dăr juang măng năr hloi, ăh đei tơdrong noh nhôn gô tơroi ăn jơnŭm vei lăng bri Ƀăk An Khê băt păng nhôn gô hơvơn tôm kơsô̆ bơngai chă xek tơlang hăm pơkăp 4 tơ̆ tơring đei khul jang tơ̆ tơring, pơgơ̆r jang tơ̆ tơring, tơmam drăm jang tơ̆ tơring, tơdrong tơgŭm kơtă đơ̆ng tơring, nhôn kơjăp, jang hadoi tơnăp vă xek tơlang dôm tơdrong đei ƀôh”

Jơnŭm vei lăng bri hơmŏ Ƀăk An Khê (apŭng Đăk Pơ, dêh char Gia Lai) dang ei tŏk bŏk vei lăng hloh 10.000 ha bri, lơ̆m noh hơgăt bri hon kơdih đei 3.600 ha, bri pơtăm pơhlom 1.000 ha. Kơtă đơ̆ng blŭng xơnăm, anih jang hlôi hơmet pơ-‘lơ̆ng Jơnŭm pơgơ̆r jang tang găn păng pĭt unh xa bri adoi nhen hơmet pơ-‘lơ̆ng 4 khul jang tơ̆ pơlei ‘nao iŏk vei lăng, păng jing khul jang tang găn păng pĭt unh xa bri.

Ƀok Lê Thái Hùng, Phŏ Kơdră Jơnŭm jang Vei lăng bri hơmŏ Ƀăk An Khê, apŭng Đăk Pơ, dêh char Gia Lai ăn tơbăt, anih jang hơtŏk chă hơlen, pơtrruh kang ƀô̆ hơlen atŭm hăm dôm khul iŏk pơkă vei lăng hơnơ̆ng chă gak hơlen tơ̆ anih pơkăp mă ƀônh ƀơm unh xa, vă dăh ƀôh băt, xek tơlang tơtom dôm anih ƀơm unh xa. Atŭm hăm noh akŏm dôm khul jang tang găn păng pĭt unh xa bri hăm khul jang truh kơ hrĕng ‘nu bơngai. Anih jang adoi tơlĕch dôm trong jang kih thuơ̆t nhen xoh ‘nhĕt uh kro kiơ̆ pơkăp, chor trong pơgăn unh xa hăm dôm tơring bri mă ƀônh ƀơm unh xa rok: “Anih jang adoi hơtŏk chă hơlen, gak vei hăm dôm khul iŏk vei lăng bri, jang atŭm hăm jơnŭm pơgơ̆r tơring păng dôm anih jang tơpôl lơ̆m tơdrong jang tơroi tơbăt, jang atŭm mưh đei unh xa bri noh adoi hơvơn khul jang tơtom. Atŭm hăm noh, Anih jang vei lăng kon pơlei dêh char păng dôm anih jang đei tơrĕk păng pơm trong hiôk ăn tơdrong jang kiơ̆ xoh adrol nhen xoh adrol kiơ̆ pơkăp vă tang găn unh xa bri, tang găn tơnăp hloh unh xa bri lơ̆m pơyan tô̆ phang”

Apŭng Đăk Pơ dang ei tŏk bŏk oei vei lăng jê̆ 24.000 ha bri, lơ̆m noh đei hloh 19.000 ha bri hon kơdih. Ƀok Đào Duy Tuấn, Kơdră Anih jang Hơlen bri ‘long apŭng Đăk  Pơ ăn tơbăt, anih jang hlôi tơlĕch pơkăp tang găn păng pĭt unh xa bri păng keh đang dôm jơnŭm jang tang găn păng pĭt unh xa bri tơ̆ apŭng, xăh; hơtŏk tơroi tơbăt ăn kon pơlei, chă hơlen dôm anih jang tơm bri, Anih jang vei lăng kon pơlei dôm xăh vă tơdrong jang tang găn păng pĭt unh xa gơh đei jơnei kơjung hloh: “Đơ̆ng blŭng xơnăm truh dang ei tam mă đei unh xa bri yơ ôh, mă lei anih jang vei lăng bri ‘long adoi ưh gơh pơhơi lơ̆m tơdrong jang tang găn păng pĭt unh xa bri. Hơnơ̆ng pơgơ̆r đe kang ƀô̆ bơngai jang, jang hadoi hăm Anih jang vei lăng kon pơlei dôm xăh, tơ-‘ngla bri hơtŏk tơroi tơbăt, pơm jang tơnăp kiơ̆ pơkăp 4 tơ̆ tơring, mưh lê̆ đei unh xa bri noh dăh tom tơpăt ưh đei lê̆ unh xa rok, mă kăl noh hơtŏk vei hơlen tơ̆ dôm tơring mă ƀônh ƀơm unh xa”