Gia Lai tơchơ̆t 'nhăk 180 unh hnam kon pơlei lĕch đơ̆ng tơring đak lơ̆p Ia Hiao
Thứ sáu, 10:42, 19/09/2025
Lan chih tơblơ̆
Lan chih tơblơ̆
VOV.Bahnar – Hăm đak lơ̆p jrŭ đunh sơnăm, Anih jang vei lăng kon pơlei xah Ia Hiao, dêh char Gia Lai 'nao pơtruh nơ̆r hăm dêh char kĭ tơchơ̆t păng asong jên vă 'nhăk truh hơnih oei 'nao ăn 180 unh hnam tơ̆ tơring đak lơ̆p hli.
'Mi tih ah blŭng khei 9 ou ki hlôi pơm đak lơ̆p jrŭ tơ̆ lơ tơring kon pơlei oei xa, pơrăm 240 ha ƀa, tơmam pơtăm kơ jê̆ 600 unh hnam, atŭm hăm trong nơnăm, hơbong đak hơlih pơchah. Ƀĭ thư Đảng uy xah, ƀok Phạm Văn Phương ăn tơbăt, tơdrong 'nhăk kon pơlei oei tơ̆ nai jĭ trong jang dơnơm vă pơtôch lê̆ tơdrong ou.
Tơring hlôi pơkăp atŭm, rơih anih teh tơjê̆ Jăl trong 25 păng anih akŏm joh ayŏ xah vă asong anih oei xa 'nao, hăm pơkăp rim rơvak să pơhlom 580 m², vei sơđơ̆ng đei teh bơ̆ hnam oei, đei hloi pơgar chă rong kon tơrong. Mưh đei dêh char asong jên jang, tơdrong jang ou gơh tơlĕch jang hloh, tơgŭm ăn kon pơlei oei xa đunh đai, pă đei pơngơ̆t kơ đon hăm 'mi kial đak hơbông bơih.
Viết bình luận