Hŏk đang Đăi hŏk găh Luơ̆t mŭk drăm sơnăm 2021, hăm lơ tơdrong jang tơnăp ‘lơ̆ng, khei 7 lơ̆m sơnăm mơ̆n, ‘nhŏng A Nguyên, bơngai Bahnar tơ̆ plei Kon Gung đei pôk pơm Phó Bí thư Đoàn xăh Đăk Mar, apŭng Đăk Hà. Kơdih kâu jĭ bơngai lui Công giáo, iŏk yoa đon jang tơnăp păng jơhngâm pran đơ̆ng bơngai oei tơdăm, khei 10/2022 tơ̆ plei Đăk Mút, ‘nhŏng A Nguyên pơjing Khul druh dăm kiơ̆ lui khop jang tŏk mŭk drăm, akŏm đei 15 ‘nu bơngai vang jang. Đơ̆ng rong kon tơrong, pơtăm hơmet ming pơgar ‘long, vei rong chĕh phe, pơtăm ‘long xa plei hăm mơ̆r, Khul hơnhăk ba iŏk yoa kơjăp ăn dôm bơngai jang pơjing đei đon lui hơđơ̆ng ‘lơ̆ng lơ̆m tơpôl.

Ƀok Lê Xuân Hưng, Bí thư Đảng xăh Đăk Mar, ăn tơbăt, Anih chĕp kơ̆l Đảng xăh tơchĕng ‘lơ̆ng tơdrong jang đei đơ̆ng khul. “Kiơ̆ đơ̆ng chă hơlen năng inh ƀôh Khul bơ̆ jang tôch đei yoa. Hrei ‘nâu dôm bơngai jang lơ̆m khul chă pơtho tơƀôh ăn băl trong vei rong ‘long pơtăm, kon tơrong kŭm nhen trong jang tŏk mŭk drăm. Tơdrong jang ‘nâu hlôi đei Anih chĕp Đảng pơtho tơƀôh pơih xă tơ̆ 2 pơlei lơ̆m xăh. Anih jang đoan apŭng Đăk Hà kŭm pơih xă tơlĕch trong jang Druh dăm kiơ̆ lui khop jang tŏk mŭk drăm tơ̆ jơ̆p tơring lơ̆m apŭng”

Đei Anih chĕp kơ̆l Đảng xăh Đăk Mar, apŭng Đăk Hà ƀôh, iŏk pơtho pơhrăm, kơdih kâu ‘nhŏng A Nguyên adrin pơtâp pơhrăm ‘năi. Khei 7/2023, A Nguyên đei dôm unh hnam tơ̆ plei Đăk Mút lui, pôk pơm ƀok pơgơ̆r pơlei. Lơ̆m khei ‘năr âu mơ̆n A Nguyên chơt hơiă đei mât jang Đảng. ‘Nhŏng A Nguyên tơroi: “Kơdih kâu inh hơnơ̆ng năm ngôi tơ̆ unh hnam pơmat tat găh mŭk drăm, unh hnam ưh gan hlôh vao lơ vă roi tơƀôh ăn mih ma duch nă athei tơplih ming đon tơchĕng, trong jang xa đơ̆ng kơdih. Athei pơtăm hơmet ming pơgar ‘long ưh gơ̆h lê̆ teh hŏh. Truh dang ei plei Đăk Mút ưh pă đei unh hnam yơ hŭt hoh teh bơih. Hnam yơ kŭm pơtăm cheh phe, sầu riêng, mit”.

Dôm anih chĕp kơ̆l đảng, khul kơdră pơgơ̆r đơ̆ng dêh char truh tơ̆ tơring lơ̆m dêh char Kon Tum hơnơ̆ng pơngơ̆t truh tơdrong pơjing khul kăn ƀô̆ bơngai kon kông, mă loi jĭ tơ̆ tơring tơrang. Hrei ‘nâu, lơ̆m hlŏh 2.000 ‘nu kăn ƀô̆, bơngai jang ăn teh đak oei bơ̆ jang tơ̆ 102 xăh, phường, thĭ trơ̆n kơ dêh char đei vă jê̆ 1.400 ‘nu kăn ƀô̆, bơngai jang ‘nŏh jĭ bơngai kon kông, iŏk đei vă jê̆ 68%.

Nhen thoi xăh Măng Bút, apŭng Kon Plông, lơ̆m kơsô̆ 22 ‘nu kăn ƀô̆, bơngai jang ăn teh đak tơ̆ xăh, đei truh 17 ‘nu kăn ƀô̆, bơngai jang jĭ bơngai Xơ Đăng. ‘Nhŏng A Dân, Phŏ Kơdră vei lăng kon pơlei xăh Măng Bút, jang tŏk đơ̆ng Tơdrong jang pơlong năng chă rơih 600 ‘nu bơngai mơlôh đei hŏk đăi hŏk năm pơm Phŏ Kơdră vei lăng kon pơlei tơ̆ xăh găh 63 apŭng tơnuh lơ̆m teh đak, pơma hơdăh, khei ‘năr adrin pơtâp pơhrăm, bơ̆ jang đơ̆ng ‘nhŏng hơnơ̆ng iŏk đei tơdrong tơgŭm đơ̆ng anih chĕp kơ̆l đảng păng khul kơdră pơgơ̆r tơring. Tơdrong ‘nâu tơgŭm ăn ‘nhŏng đei dơ̆ng jơhngâm đon adrin, hơmet kơdih kâu păng jơhngâm lơ hlŏh dơ̆ng ăn pơlei pơla:

“Inh jang kiơ̆ Tơdrong jang 600 ‘nu Phŏ Kơdră vei lăng kon pơlei xăh, đei Đảng, teh đak rơih pơtho pơm kăn ƀô̆ mơlôh, kăn ƀô̆ bơngai kon kông vă pơjing khul jang, inh ling lang hơđơ̆ng jơhngâm, adrin păng đei pôk pơm Phŏ Kơdră vei lăng xăh jăl jang mă 2. Inh hlôi đei hŏk Trung cấp lý luận chính trị, hŏk lăm chuyên viên. Dang ei đei anih chĕp kơ̆l đảng păng khul kơdră pơgơ̆r xăh, ăn năm hŏk dơ̆ng tơ̆ lăm hŏk Cao cấp lý luận chính trị”. 

Đơ̆ng rŏng 33 sơnăm pơjing dơ̆ng dêh char, Kon Tum hlôi pơjing đei khul kăn ƀô̆, bơngai jang ăn teh đak đei hlŏh 18.000 ‘nu, lơ̆m noh kăn ƀô̆ bơngai kon kông đei 4.100 ‘nu bơngai, iŏk đei hlŏh 22%. Jang tơ̆ dêh char Kon Tum đei 82 ‘nu kăn ƀô̆ bơngai kon kông, jang đơ̆ng Phŏ Kơdră anih jang tŏk tơ̆ kơpal; tơ̆ apŭng đei 225 ‘nu kăn ƀô̆ kon kông, jang đơ̆ng kơchư̆k Phŏ kơdră anih jang tŏk tơ̆ kơpal; tơ̆ xăh đei 397 ‘nu kăn ƀô̆ kon kông, pơm bơ̆n bí thư, phó bí thư; Kơdră, Phŏ Kơdră Jơnŭm pơgơ̆r kon pơlei, Anih vei lăng kon pơlei păng pơm kơdră, pơm phŏ dôm khul jang chinh trĭ, tơpôl.

Ƀok Lê Viết Nam, Phŏ Kơdră Anih jang Nội vụ dêh char Kon Tum ăn tơbăt, tơdrong pơtho khul jang, rơih hơmet, pôk hơtŏk kăn ƀô̆ bơngai kon kông đei Anih chĕp kơ̆l Đảng dêh char păng Anih vei lăng kon pơlei dêh char năng kăl: “Dêh char hlôi tơlĕch tơdrong jang pơjing khul kăn ƀô̆ bơngai kon kông. Đang kơ ‘nŏh rim anih chĕp kơ̆l đảng chih tơlĕch hla ar pơtho vă tơdrong jang rơih hơmet, pôk hơtŏk hơnơ̆ng hue năng truh tơ̆ khul kăn ƀô̆, bơngai jang kơ teh đak jĭ bơngai kon kông. Hrei ‘nâu vă truh Hop akŏm dơ̆ng bơih, lơ kăn ƀô̆ bơngai kon kông tơ̆ dôm anih jang, khul grŭp đei rơih hơmet, vă pôk hơtŏk pơm kơchư̆k chĕp kơ̆l anih jang, mă loi jĭ dôm anih jang kơpal tơ̆ dêh char, apŭng, pơlei tơm đei rơih hơmet tôm kơsô̆ kăn ƀô̆ bơngai kon kông tŏk jang dôm kơchưk kăl”./.