Ƀok Rơ Lan Lết, tơ̆ plei Klăh, xăh Ia Mơ, dêh char Gia Lai đei 2 ‘nu kon oei hŏk 1 năr 2 vât tơ̆ hnam trưng jăl mônh păng jăl ƀar Nguyễn Văn Trỗi. Rim năr, ƀok athei chơ ba kon yak vih vât 4 'măng, đei năr hăt choh jang mir na, đe oh athei năm hŏk kơdih, hao hăi gre tang vang, 'nŭng ba por vă sŏng 'năr dơ̆ng, tôch pơmat tat.

Kơlih thoi noh, mưh kơtơ̆ng xăh Ia Mơ gô đei tơlĕch vă jê̆ 200 ti hlak jên vă man hnam trưng teh đak rong hŏk tro kon kông tơ̆ anih teh xă 6 ha tơter trong gre 664, hăm tôm lăm hŏk, anih jang, anih oei xa, hnam gŏ, cham pơm ngôi kŭm hăm unh điên, đak păng anih jang pơgang tơ̆ hnam hŏk đei man 'lơ̆ng, ƀok Lết ưh kĕ ôn jơhngâm đon chơt hơiă.

Ƀok Lết lui, mưh hnam trưng đei man đang, kon hơ 'lơ̆p kơdih kâu gô đei anih oei xa sơđơ̆ng 'lơ̆ng tơ̆ hnam trưng, đei hŏk pơhrăm tơ̆ lăm hŏk ‘nao kơjăp 'lơ̆ng, hăm tôm tơmam hŏk pơhrăm: “Pơma găh hnam trưng, adrol ki kŭm huei mơ̆n bơih. Mă lei truh âu kơnh, khul kơdră pơgơ̆r tơring 2 tăl vă tơlĕch jên man hnam trưng ăn kon hơ ‘lơ̆p oei kơtă hloi, hnam trưng ‘nao hơiă dêh. Kon pơlei tôch čhôk ‘nă, thoi noh tôch ‘lơ̆ng”.

Ưh lăp đe mĕ ƀă hŏk tro đĕch mă đe thây kô kŭm tôch hơiă. Ƀok thây Ngô Văn Vững, Phŏ Hiê̆u trơng tơ̆ Hnam trưng jăl mônh păng jăl ƀar Nguyễn Văn Trỗi, xăh Ia Mơ tơroi, tơ̆ tơring đei lơ hnam hŏk hơtăih truh 18 km, pơm ăn hŏk tro tơ̆ tơring hơtăih yăih athei yak trong tôch hơtăih mă ưh 'nŏh năm hŏk tơ̆ dêh char nai. Kơlih thoi noh, tơdăh đei hnam trưng teh đak rong tơ̆ âu 'nŏh gô sek tơlang đei tơdrong tơdrong hŏk tro đa pơdơ̆h hŏk, pơm hơtŏk tơdrong 'lơ̆ng mưh pơtho pơhrăm: “Tôch hơiă. Tơchĕng adrol hnam trưng gô đei hnam trưng ‘nao roi kơjăp ‘lơ̆ng, đei tôm tơmam pơtho pơhrăm. Đei tôm lăm hŏk, anih jang mă hrei ‘nâu hnam trưng oei tam mă đei. Thoi noh hnam trưng gô đei pơm hơmet tơ̆ 1 anih. Tơdrong ‘nâu vang tơgŭm roi pơm hơtŏk ‘lơ̆ng hlŏh dơ̆ng tơdrong pơtho pơhrăm.”

Kŭm hăm xăh Ia Mơ, hrei ‘nâu, Anih vei lăng kon pơlei xăh Ia Púch, dêh char Gia Lai kŭm oei chă rơih teh xă 5ha tơ̆ plei Goòng, anih đei trong yak vih vât hiôk hian vă chưk hơmet teh man hnam trưng teh đak rong hŏk tro kon kông ăn hlŏh 730 ‘nu hŏk tro jăl mônh păng jăl ƀar. Tơdrong jang âu đei 24 lăm hŏk, 14 anih jang kŭm hăm Anih mong đŏk hla ar, lăm roi tơƀôh găh tơdrong hŏk pơhrăm, anih pơhrăm tơplŏng kơdâu, anih oei xa, hnam oei ăn thây kô păng anih jang ki thuơ̆t kơjăp ‘lơ̆ng.

Ƀok thây Phan Thành Tiến - Hiê̆u trơng Hnam trưng jăl mônh păng jăl ƀar Phù Đổng, xăh Ia Púch ăn tơbăt: “Trong jang man Hnam trưng teh đak rong hŏk tro kon kông âu tôch lăp. Hŏk tro jĭ kon hơ ‘lơ̆p đe công nhân bơ̆ jang tơ̆ dôm mir đak lar, Khul choh jang kŭm tôch lơ. Găh noh dơ̆ng, kơsô̆ hŏk tro bơngai kon kông kŭm lơ ‘năi, iŏk đei hlŏh 67%. Mưh tơlĕch trong jang man Hnam trưng teh đak rong hŏk tro âu sư pơjing đei tơdrong ‘lơ̆ng ăn đe oh hŏk tro hŏk pơhrăm roi ‘lơ̆ng ƀiơ̆”.

Kiơ̆ kơsô̆ chih jô̆, tơ̆ tơring sơlam găh Pơmât dêh char Gia Lai dang ei đei hlŏh 9.400 'nu hŏk tro. Lơ̆m noh đei 54,65% jĭ kon hơ 'lơ̆p bơngai kon kông. Kiơ̆ trong jang đơ̆ng Anih tơm Chinh trĭ găh tơmât jên jang man Hnam trưng teh đak rong hŏk tro kon kông jăl mônh păng jăl ƀar tơ̆ 248 xăh sơlam tơ̆ kông lơ̆m teh đak, tơchĕng adrol dêh char Gia Lai gô đei tơlĕch dang 1.200 ti hlak jên vă man tơ̆ 7 xăh sơlam găh Pơmât.

Iŏk đơ̆ng khei 7/2025 truh dang ei, Anih vei lăng kon pơlei dêh char Gia Lai hlôi pơtho ăn Anih vei lăng pơtho pơhrăm dêh char jang hơdoi hăm Khul kơdră tơring pơgơ̆r chă teh, atŭm hăm ‘nŏh athei dôm Anih vei lăng tơdrong jang jăh pơm pơkeh hla ar vă tơlĕch jang. Tơchĕng hơdrol, 1,2 tơdrong jang gô đei tơlĕch jang đơ̆ng hơtuch sơnăm 2025 hloi.

Ƀok Phạm Anh Tuấn, Phó Bí thư Đảng dêh char, Kơdră vei lăng kon pơlei dêh char Gia Lai athei dôm xăh jăh pơm mă hrĕnh bơ̆n hla ar teh păng hnam trưng vă jăh tơlĕch jang hrôih: “Athei dôm anih jang, tơring tơrang jăh pơgơ̆r hloi tơdrong pơm hla ar teh, hla ar pơjao jang, jô̆ hơlen, hrŭ ‘mong teh. Kơplăh dang ei ‘nŏh iŏk teh vă man Hnam trưng teh đak rong, jăh jang hloi lơ̆m khei 9 vă khei 10/2025 âu kơnh đei hla ar čhơ̆ rup hnam trưng đơ̆ng Anih tơm vei lăng ming man ‘nŏh dêh char pơgơ̆r man kiơ̆ hloi”.

Hăm đon pơhnŏng ‘nŏh, lơ hnam trưng đei man kơjăp ‘lơ̆ng kơtă tơ̆ tơring sơlam pơmat tat kơ dêh char Gia Lai đĭ vă đei tơpă bơih, pơih đei 1 tơdrong ‘lơ̆ng ‘nao ăn tơdrong hŏk pơhrăm kơ chăl mơlôh.