Tơdrong pơlong Hơdrĕng cheh phe Việt Nam vă pơgơ̆r ‘năr 10/3/2025, tơbăt hơdăh pơtôch păng pơjao tơmam hơpăh lơ̆m ‘năr 13/3/2025, ƀlep ƀơ̆t ‘măng pơgơ̆r Lêh cheh phe Buôn Ma Thuột ‘măng mă 9. Bơngai vang pơlong ‘noh kon pơlei Việt Nam đơ̆ng 18 sơnăm tơ̆ kơpal, tŏk bŏk hơrih sa păng bơ̆jang tơ̆ hơgăt teh Việt Nam. Dôm bơngai pơlong gô yak hloh dôm tơdrong pơlong, ‘noh đei: lăng, rơih, iŏk găr cheh phe yua vă hơdrĕng; pơm joăt hăm kơmăy hơdrĕng; nôp hla ar vă hơdrĕng păng kơƀang tơroi ƀâu phu tơmam; hơdrĕng kơtă....

Ƀok Trịnh Đức Minh- Kơdră Khŭl jang cheh phe Buôn Ma Thuột roi tơbăt, dêh char Đắk Lắk tŏk bŏk hơdrin hơtŏk tơiung Buôn Ma Thuột jing pơlei tơm cheh phe kơ apŭng plĕnh teh, hơdai hăm tơdrong tơƀôh hơdăh găh hơgăt teh pơtăm, tơmam lơ ‘noh tơdrong ‘lơ̆ng, ƀâu phu cheh phe đơ̆ng rŏng kơ pơm tơlĕch kăl kơ đei bơngơ̆t truh. Đơ̆ng tơdrong jơnei đơ̆ng ‘măng pơlong ‘măng mă mônh, tơ̆ ‘măng pơlong sơnăm ‘nâu, Khŭl jang hơnơ̆ng đei lơ tơplih ‘nao vă dôm bơngai hơdrĕng đei tơdrong hiôk tơƀôh đon hơgei đơ̆ng kơdih. Hơdai hăm, pơm đei dôm tơmam cheh phe pơm tơlĕch ‘lơ̆ng, hơtŏk đei dôm kơjă kăp gĭt ‘nao đơ̆ng cheh phe lơ̆m kơplăh hơdrĕng.

Ƀok Trịnh Đức Minh roi tơbăt: “Tơdrong pơlong sơnăm ‘nâu găh trong jang, găh tơdrong pơgơ̆r tih ƀiơ̆, jơ̆p să ƀiơ̆, đei tơdrong tơpôl lơ ƀiơ̆. Mă 2, châm điêm kơchŏk cheh phe đei châm kiơ̆ kơmâu ‘nao lăng kiơ̆ lơ̆m tơdrong hơgăt ‘lơ̆ng đơ̆ng SCA (Jơnŭm Cheh phe ‘lơ̆ng Apŭng plĕnh teh) păng CQI (Anih vei lăng tơdrong ‘lơ̆ng đơ̆ng Cheh phe - tơ̆ Mi). Mă 3 ‘noh hơvơn bơngai joăt jang teh đak đe hơgei hơlen lăng tơdrong ‘lơ̆ng đơ̆ng cheh phe vă sơng đei dôm bơngai hưch hanh kơ cheh phe truh hăm anih tơm jang cheh phe”.

Việt Nam hlôi năm hơdrol găh cheh phe Robusta ‘lơ̆ng kơ apŭng plĕnh teh ‘noh kŭm athei đei dôm bơngai hơdrĕng cheh phe hơgei hloh apŭng plĕnh teh. ‘Nâu jĭ ‘meh vă đơ̆ng kơdră vei lăng Khŭl jang cheh phe Buôn Ma Thuột, anih pơgơ̆r tơdrong pơlong Hơdrĕng cheh phe Việt Nam 2025. Đơ̆ng rŏng 2 khei tơlĕch jang tơdrong pơlong păng hlôi iŏk đei roi tơbăt đơ̆ng 36 ‘nu bơngai pơlong truh đơ̆ng 13 dêh char păng pơlei tơm vang chih măt, lơ̆m noh dêh char Đắk Lắk păng pơlei tơm Hồ Chí Minh đei bơngai pơlong chih măt lơ hloh.

Tơdrong pha đơ̆ng ‘măng pơlong âu pơting hăm dôm ‘măng pơlong hơdrĕng apŭng plĕnh teh ‘noh jĭ iŏk yua cheh phe Arabica păng Robusta Việt Nam. Bơngai pơlong athei hơdrĕng tơmam Pour Over (mĭnh trong pơm hăm ti tơgŭm tơlĕch ƀâu phu ‘lơ̆ng đơ̆ng cheh phe) păng pơm phin. Hơdai hăm ‘noh, athei gơh kloh klĕch 3 tơdrong; lăng ‘lơ̆ng cheh phe găr, hơdrĕng păng pơm. Lơ̆m noh, kăl kơ lăng truh tơdrong châm điêm kơchŏk cheh phe gô đei châm kiơ̆ kơmâu ‘nao lăng kiơ̆ lơ̆m tơdrong hơgăt ‘lơ̆ng đơ̆ng SCA Jơnŭm Cheh phe ‘lơ̆ng Apŭng plĕnh teh) păng CQI (Anih vei lăng  tơdrong ‘lơ̆ng Cheh phe - tơ̆ Mi).

Kiơ̆ kơ ƀok Lê Đức Huy, Phŏ Kơdră Khŭl jang cheh phe Buôn Ma Thuột, tơdrong pơlong Hơdrĕng cheh phe Việt Nam ưh khan lăp jing hơnih akŏm dôm bơngai hưch hanh hăm cheh phe vă vang tơroi băl tơdrong hlôh vao, pơm hơnih tơgoăt hơdai đei tơdrong kĕ sơng iŏk, tơƀôh tơdrong hơiă, hưch hanh găh cheh phe mă oei jing trong jang hơtŏk ‘lơ̆ng kơjă kăp gĭt đơ̆ng cheh phe Việt Nam.

Ƀok Lê Đức Huy roi tơbăt: “Vă hơtŏk tơiung kơjăp anih tĕch mơdro ưh khan lăp bơ̆n hơtŏk tơiung pơtruh mă oei athei hơtŏk tơiung ‘meh vă. Việt Nam hlôi tơƀôh hơdăh bơ̆n ‘noh jĭ teh đak pơm tơlĕch cheh phe Robusta ‘lơ̆ng kơ apŭng plĕnh teh ‘noh bơ̆n kŭm athei đei bơngai hơdrĕng cheh phe hơgei hloh apŭng plĕnh teh”.

Gơh tơroi, tơdrong pơlong Hơdrĕng Cheh phe Việt Nam 2025 jĭ 1 tơdrong jang hơdăh păng ‘lơ̆ng, pơtrŭt tơdrong hơtŏk tơiung đơ̆ng anih jang cheh phe kiơ̆ trong hơgei păng kơjăp ‘lơ̆ng. ‘Nâu ưh khan lăp jing tơdrong hiôk vă pôk pơ ư dôm bơngai hơdrĕng gơh hơgei mă oei jing 1 hơyak năm gĭt kăl lơ̆m kơplăh bơ̆jang hơtŏk ‘lơ̆ng cheh phe Việt Nam.

Hơdai hăm tơdrong pơlong Hơchĕng cheh phe, lơ̆m jơnăr pơgơ̆r Lêh cheh phe Buôn Ma Thuột ‘măng mă 9 sơnăm 2025, Khŭl jang cheh phe Buôn Ma Thuột oei pơgơ̆r dơ̆ng dôm tơdrong jang vă sơng đei tơmoi nhen: Tơdrong pơlong The Art Amazing Cup 2025 ‘măn ăn đe buăl hưch hanh kơ tơdrong pơm cheh phe ‘lơ̆ng, lơ̆m ‘năr 11/3 păng Talkshow hăm hơnăn “Buôn Ma Thuột hơnih truh đơ̆ng cheh phe Apŭng plĕnh teh” hăm lơ bơngai roi tơƀôh hơgei.