Vă jang kiơ̆ păng lang să tơdrong kăp gĭt kơsơ̆p hla bơar “Kơrŭn đĭ jơhngơ̆m, hơdrin tơ jră tang găn sa pơgơ̆m pơjĭp, pơm tơdrong glăi, tơgop tơ iung pơjing Đảng păng teh đak bơ̆n roi năr roi rơgoh, pran kơtang” đơ̆ng Tổng Bí thư Nguyễn Phú Trọng lơ̆m rim kang ƀô̆ đoàn păng bơngai jang đoàn, hơdruh tơdăm lơ̆m Khul rim Hơnih bơ̆ jang Trung ương, kơsơ̆ năr 13/3 tơ̆ Hà Nội, Khul kơdră chĕp pơgơ̆r Đoàn Khul hơnih bơ̆ jang Trung ương hlôi pơgơ̆r “Hơdruh tơdăm Khul rim hơnih bơ̆ jang Trung ương kơrŭn đĭ jơhngơ̆m iung tơjră, tang găn sa pơgơ̆m pơjĭp, pơm tơdrong glăi”.

Tơ̆ Hop akŏm, Kơ iĕng Kơdră chĕp pơgơ̆r Học viện Chính trị Quốc gia Hồ Chí Minh Lê Văn Lợi pơma hơdăh, ‘nau jing hop akŏm khoa hŏk tơƀôh hơdăh tơdrong lăng ba kơjăp đơ̆ng hơdruh tơdăm Khul rim hơnih bơ̆ jang Trung ương hăm bơ̆ jang iung tơjră tang găn sa pơgơ̆m pơjĭp, pơm tơdrong glăi. Rim nơ̆r pơma tơ̆ hop akŏm hlôi akŏm lơ̆m rim tơdrong nhen: Ƀôh hơdăh dôm tơdrong sa pơgơ̆m pơjĭp, pơm glăi kơ yuơ Đảng păng teh đak tơlĕch jang jing mĭnh trong iung jang kăl hloh ư̆h kơ gơ̆h tơplih ôh. Pơm hơdăh dôm tơdrong tơgop đơ̆ng hơdruh tơdăm Khul rim hơnih bơ̆ jang Trung ương lơ̆m bơ̆ jang iung tơjră, tang găn sa pơgơ̆m pơjĭp, pơm glăi lơ̆m khei năr au ki. Đơ̆ng noh tơlĕch rim trong jang, tơdrong jang vă atŏk loi dơ̆ng hơnăp jang, jơhngơ̆m đon iung jang kơtang đơ̆ng hơdruh tơdăm Khul rim hơnih bơ̆ jang Trung ương lơ̆m “Pơma ưh hăm sa pơgơ̆m pơjĭp, pơm glăi”.