Khul dăr hơlen klăih sơng pơm 2 grŭp, jur dăr lăng tơ̆ 8 xăh, phường đei: Xuân Lãnh, Sông Cầu, Phú Yên, Tuy An Nam, Krông Năng, Krông Pắc, Ea Kar păng phường Buôn Ma Thuột. Tơ̆ dôm tơring, khul chă mơ̆ng nơ̆r tơroi, pơma nuh hăm kơdră chĕp kơ̆l đảng, khul kơdră tơring, mặt trận, dôm anih jang đei ƀơm truh găh tơdrong jang atŏk tơiung mŭk drăm tơpôl, tơdrong pơm hla ar, tơplih hăm kơmăy sô̆ păng bơ̆ jang đơ̆ng khul kơdră pơgơ̆r tơring đơ̆ng rŏng kơ tơmât hơdai bơ̆ jang kiơ̆ trong pơgơ̆r 2 tăl.

Mă tơpă tơ̆ 1,2 tơring ăn ƀôh, hơdai hăm dôm tơdrong tơplih ‘lơ̆ng, trong jang đơ̆ng khul kơdră pơgơ̆r tơring 2 tăl kŭm đei lơ tơdrong pơmat tat. Tơdrong jang tŏk lơ đơ̆ng rŏng kơ tơmât hơdai oei bơngai jang 'nŏh tam mă pơtruh tơtom, lơ tơdrong jang nhen kơmăt kơmŏk roi tơbăt, jên hu – kế toán oei ưh kơmăh kăn ƀô̆ jang, jing bơ̆ jang tôch trăp trĭn. Kŭm hăm 'nŏh, tơmam drăm, anih jang tam mă pơm lăp hăm tơdrong 'mĕh vă, kơmăy kơmŏk tam mă sơđơ̆ng 'lơ̆ng, tơdrong pơm hla ar teh păng 1,2 hla ar kăl nai oei tơhlăk tăk… Khul dăr hơlen vă chih akŏm tôm tơdrong tơroi ăn Anih chĕp kơ̆l pơgơ̆r Quốc hội vă gơ̆h tơlĕch đei dôm tơdrong tơgŭm lăp 'lơ̆ng, tơtom hơmet ming rim tơdrong oei tơhlăk, pơmat tat.