Jơ hơlen pơtôch hăm vang pơgơ̆r đơ̆ng hloh 40.000 ‘nu bơngai kơ rim khul Ƀô̆ đô̆i, Kŏng ang, kon pơlei, Khul dơ̆ng păng ƀrơ̆m phao kơtoang, gre khul bô̆ đô̆i kŏng ang, atŭm hăm khul kon pơlei vang năm. Mă kăl, pơih blŭng ăn jơ hơlen ‘noh nơ̆r pơma tơblang hơdăh kơtă đơ̆ng hơnih pơdăh Khánh Hòa, hăm um rup clip iung yak pơrŏ pơ ư kơ rim khul ƀô̆ đô̆i đak dơsĭ, đei vang năm đơ̆ng duk môch đak, duk phao kơnong, ƀrơ̆m ŭnh, rim kơ loăi duk kanh sat đak dơsĭ, Khul jang dăr lăng hơlen rôp ka hơdang, khul ƀok thây pơgang ƀô̆ đô̆i, gre vơvêl ... iung yak kơjăp iăp kơtang ‘lơ̆ng rŏ kơ rim khul ƀô̆ đô̆i, kŏng ang păng kon pơlei pơla hlôi pơm hơtŏk jơhngơ̆m đon hưch hanh hơmanh bơnê hơdrĕch hơdrung, pơm hơtŏk jơhngơ̆m đon nuih mơng kơ teh đak pran kơtang lơ̆m iung tơblăh, yak kơjăp iăp kơtang lơ̆m tơ iung pơjing păng vei lăng Teh đak. Kiơ̆ trong pơprŏ, hơdrol mơ̆t lơ̆m năr Pơm lêh tơpă ƀơ̆t pơgê năr 2/9, ‘măng pơgơ̆r hơlen pơtôch pơhrăm iung yak pơ ư gô đei pơgơ̆r lơ̆m pơgê năr 30/8.