Lơ̆m jơnăr năm hơpong tơ̆ Argentina, ƀok Nguyễn Trọng Nghĩa đei jơ pơma đam, tơƀâp, pơma nuh hăm Tổng Bí thư dang ei kơ Đảng Cộng sản Argentina Jorge Kreyness;  Kơdră Anih jang tơbôl kơ Đảng Công lý, Kơdră tơm so vei lăng khul linh teh đak păng Kơdră jang tơƀôl Jorge Taiana. Khul vang Hop akŏm pơma nuh đei hơnăn “Ƀok Hô păng tơdrong pơvei Việt Nam- Mi La-tinh”; plang pơyơ̆r pơkao ƀât rup man Ƀok Hô, năm ngôi păng bơ̆ jang hăm Anih tang măt ăn Việt Nam tơ̆ Argentina.

Găh tơdrong pơvei đơ̆ng Việt Nam păng Argentina, 2 păh hlôi pơma nuh păng drơ̆ng nơ̆r hơnơ̆ng ăn khul jang kơpal, kon pơlei tơƀâp băl, pơma nuh; pơm hơtŏk tơdrong đei yoa đơ̆ng dôm trong jang hơdoi hrei ‘nâu, pơih xă truh tơdrong jang nai hai; hơtŏk tơdrong roi tơbăt ăn băl dôm tơdrong kăl mưh tơiung pơjing đảng păng jang tŏk teh đak; vang jang hơdoi păng tơgŭm băl tơ̆ dôm khul grŭp lơ̆m tơring păng lơ̆m apŭng plenh teh.