Ƀlep ƀât tơbăt Năr tơdrong bơ̆ jang lơ̆m tơpôl Việt Nam ‘măng mă 7, pơgê 23/3, tơ̆ Hà Nội, Trung ương Đoàn TNCS Hồ Chí Minh jang hơdoi hăm Anih tơm vei lăng tơdrong jang xa bơngai jĭ rơka păng tơpôl pơgơ̆r hop akŏm apŭng plenh tĕh “Hơmet pơ ‘lơ̆ng luơ̆t vă atŏk tơiung tơdrong jang lơ̆m tơpôl tơ̆ Việt Nam”.

Dôm sơnăm âu ki, Đảng păng tĕh đak bơ̆n hơnơ̆ng tơrĕk truh, tơlĕch lơ trong tơgŭm sek tơlang rim tơdrong lơ̆m tơpôl đei ƀôh lơ̆m khei ‘năr jang tŏk. Dôm tơdrong hơgăt đơ̆ng luơ̆t păng tơdrong tơgŭm lơ̆m tơpôl đei tơlĕch dơ̆ng vă pơm lăp ăn tơdrong bơ̆ jang lơ̆m tơpôl nhen: Luơ̆t bơ̆ jang; Luơ̆t Bơngai kră; Luơ̆t Bơngai kơmlo jojăn; Luơ̆t đe hơiŏh, Tơdrong hơgăt kơsô̆ 20 đơ̆ng Khul kơdră tĕh đak chih hơdăh trong tơgŭm hăm dôm bơngai kăl đei tơgŭm lơ̆m tơpôl.

Tơ̆ hop akŏm, dôm bơngai juăt jang, bơngai jang khoa hŏk chă roi tơƀôh dôm tơdrong kăl lơ̆m apŭng plenh tĕh păng tơdrong đei tơpă tơ̆ yăn âu lơ̆m tơpôl Việt Nam vă hơmet pơ ‘lơ̆ng luơ̆t păng trong pơvih pơvăn lơ̆m tơpôl; pơma nuh găh tơdrong jang đơ̆ng tơpôl lơ̆m tơdrong jang pơgang, hnam trưng; Tơdrong tôch gĭt kăl đơ̆ng tơdrong jang hơdoi lơ̆m tơpôl vă atŏk tơiung tơdrong vei lăng năng tông đe hơiŏh.