Tơ̆ lơ hnam tĕch hla ar tih nhen: Hnam tĕch hla ar Giáo dục, Lý Thường Kiệt, Hai Bà Trưng… kơ dêh char Đắk Lắk, mĕ ƀă păng hŏk tro năm răt bơ̆n hla ar, tơmam pơyua ăn hŏk pơhrăm tŏk lơ, mă loi ‘noh tơ̆ kơmăng păng hơtuch giĕng. Dôm kơsơ̆p hla ar blŭng jăl nhen lăm 1, lăm 6 păng lăm 10 ling lang oei lơ̆m grŭp tĕch hlot lơ. Mĕ ƀă hŏk tro tơ̆ phường Tân Lập tơroi: “Dôm kơloăi hla ar tơ̆ âu tôch kơ lơ, đơ̆ng hla ar hŏk, hla ar hơlen lăng truh hla ar tơgŭm. Kơjă tĕch kŭm lăp. Ĭnh lăp kăl ăn hơnăn hnam trưng ‘noh bơngai tĕch hla ar iŏk tôm hla ar tôch kơ hrĕnh, hiôk.”

Vă vei sơđơ̆ng pơtruh ăn anih tĕch mơdro, Kŏng ti tĕch mơdro Hla ar păng Tơmam yua lơ̆m hnam trưng hŏk Đắk Lắk hlôi răt tơmơ̆t hloh 4 triệu kơsơ̆p hla ar (hơtŏ 45 ti hlak jên), hloh 1 triệu blăh hla ar chih (vă jê̆ 4 ti hlak jên) dang 25 ti hlak jên ăn tơmam pơvih ăn bơ̆jang, tơmam hŏk pơhrăm. Ƀok Trương Văn Băng - Kơdră vei lăng Kŏng ti pơma hơdăh: “Kŏng ti pơvih pơvăn tôm tĕch ăn kơ đĭ đăng hŏk tro. Nhôn vei sơđơ̆ng măh măh hla ar hŏk, tơmam hŏk pơhrăm păng dôm tơmam yua pơtho pơhrăm ăn sơnăm hŏk ‘nao.”

Kŭm hăm anih tĕch hla ar hŏk, hơbăn ao hŏk tro kŭm mơ̆t lơ̆m pơyan răt lơ. Dôm hơnih tĕch hơbăn ao hŏk tro tơ̆ phường Buôn Ma Thuột păng lơ phường, xăh hlôi hơmet ăn tơmam đơ̆ng hrôih, đei lơ kơ loăi lăp hăm rim hnam trưng. Mŏ Nguyễn Thị Mỹ Trang, mĕ hŏk tro tơ̆ phường Thành Nhất roi tơbăt; Kơjă hơbăn ao hŏk tro sơnăm ‘nâu sơđơ̆ng, đơ̆ng 180.000 – 350.000 hlak jên 1 blăh; hơbăn ao tơplŏng kơdâu dang 80.000 – 200.000 hlak jên 1 blăh. Mŏ đei trong rơih răt hơbăn ao chơ choh đang tơplih yua kơ năm chơ choh nhen hơdrol, ‘mơ ‘met jên hai, đei lơ kơ loăi hai: “Ĭnh ba 2 ‘nu kon năm răt hơbăn ao hŏk tro, tơ̆ hơnih tĕch mơdro hlôi đei hơbăn ao đơ̆ng hnam trưng kơ na tôch kơ hiôk. Đei lơ hơbăn ao ‘lơ̆ng, kơjă kŭm trŏ lăp”.

Kăl kơ lăng truh, sơnăm ‘nâu dôm tơmam pơyua ăn sơnăm hŏk ‘nao đei pơm tơlĕch lơ̆m teh đak 70-80%. Dôm hơnăn ‘lơ̆ng Việt hlôi đei lơ tơplih găh kơloăi, ‘lơ̆ng, kơjă trŏ lăp, đei mĕ ƀă hŏk tro lui ngeh rơih iŏk. ‘Nâu kŭm jing tơƀôh hơdăh ‘lơ̆ng ăn đei yua đơ̆ng tơdrong krao hơvơn “Bơngai Việt Nam yua tơmam Việt Nam”. Yă Phạm Thị Kim Anh – tơ ‘ngla hơnih tĕch mơdro hơbăn ao hŏk tro Bi Phạm, phường Buôn Ma Thuột, dêh char Đắk Lắk tơroi: “Lơ̆m pơyan mơ̆t hŏk, hơnih tĕch mơdro pơih ‘măng đơ̆ng 6 jơ pơgê vă mĕ ƀă hŏk tro răt ƀônh. Tơmam đei pơm tơlĕch tơ̆ dôm hơnih pơm tih lơ̆m teh đak, vei sơđơ̆ng mah mai, sơđơ̆ng ‘lơ̆ng. Nhôn lăng kăl pơđĭ hloi trong chơ choh, kơchơ̆t tơmam che vă hŏk tro hrŭk hiôk prăt năr hŏk”.

Hăm tơdrong hơmet ăn ‘lơ̆ng đơ̆ng dôm anih pơm tơlĕch hla ar hŏk, hơnih tĕch hơbăn ao hŏk tro păng hơnih tĕch jơ̆p jang, mĕ ƀă păng hŏk tro tơ̆ Đắk Lắk gơh sơđơ̆ng hơdrol sơnăm hŏk ‘nao.