Tơ̆ jơ pơm lêh, Hơnih tơm chĕp pơgơ̆r Quân khu 7 hlôi pôk ăn Hla bơar hôn bơnê ăn 23 khul păng 52 ‘nu bơngai jang ‘lơ̆ng lơ̆m bơ̆ jang hơdoi pơtho tơbăt găh tơdrong bơ̆ jang kơ khul ƀô̆ đô̆i Quân khu lơ̆m sơnăm 2024 păng 6 khei blŭng sơnăm 2025. Lơ̆m ou, Hơnih bơ̆ jang Radiô Nơ̆r Pơma Việt Nam oei tơ̆ pơlei tơm Hồ Chí Minh đei sơng iŏk Hla bơar pôk bơnê ăn khul jang păng 1 ‘nu bơngai. Iung pơma tơ̆ jơ tơƀơ̆p, Thiếu tướng Trần Vinh Ngọc, Chính ủy Quân khu 7 athei lơ̆m khei năr ou kơnh, rim hơnih bơ̆ jang chih kơtơ̆ng ang hơnơ̆ng iung jang hơdoi, akŏm tơroi tơbăt găh dôm trong bơ̆ jang kăl vei lăng sơlam teh đak-vei lăng sơđơ̆ng; rim tơdrong jang pơtho pơhrăm tơblăh, kơchăng iung tơblăh; tang găn tŏ ‘mi kial, pơrang jĭ pơrăm, năm tơgŭm dŏng. Atŭm hăm ‘noh chih tơroi tơbăt găh tơ iung pơjing tơdrong jang đĭ đăng kon pơlei vang vei lăng sơđơ̆ng teh đak, tơklep hăm trong jang vei lăng sơđơ̆ng lơ̆m kon pơlei păng tơ iung pơjing bro kơchăng tang găn kơjăp lơ̆m tơring Quân khu.