Lăp đơ̆ng rŏng mơ̆ng bơngai tang măt kơdră chĕp pơgơ̆r Hơnih Đảng pơlei tơm tơroi tơbăt Hla bơar tơbăt nơ̆r apĭnh găh trong pơprŏ, nơ̆r tơgop rim hơnih jang vang tơgop lơ̆m Trong vă pơprŏ tơdrong jang, Hơnih tơm Chinh trĭ hlôi akŏm pơma dơnuh păng drơ̆ng nơ̆r găh dôm trong tơlĕch jang tih, gĭt kăl pơchoh trong pơprŏ Pơlei tơm Hồ Chí Minh. Pơma pơtôch Hop akŏm, Tổng Bí thư, Kơdră chĕp pơgơ̆r Teh đak Tô Lâm pơkă, pơma hơdăh mĭnh ƀar tơdrong kăl. Trong pơprŏ jang kăl tơlĕch jang mă trŏ ƀlep rim trong tơlĕch jang đơ̆ng Đảng, rim tơdrong tơchơ̆t đơ̆ng Khul kơdră chĕp pơgơ̆r Trung ương Đảng, Hơnih tơm Chinh trĭ, Ban Bí thư tơlĕch ăn lơ̆m khei năr ou ki. Trong pơprŏ jang kăl tơbăt hơdăh hơnăp jang, hơnih dơ̆ng gĭt kăl kơ Pơlei tơm Hồ Chí Minh, jĭ hơnih tơm jang mŭk drăm, joh ayŏ, pơtho pơhrăm, khoa hŏk-kmăi kmŏk kơ lơ̆m teh đak. Hơnih tơm Chinh trĭ athei Hơnih Đảng pơlei tơm Hồ Chí Minh akŏm chĕp pơgơ̆r pơrô̆ jang kiơ̆ trong tơlĕch jang kiơ̆ Trong pơprŏ jang.