Pơma pơgơ̆r Hop akŏm, Tổng Bí thư Tô Lâm, Ƀĭ thư Kuân uy Trung ương ră hơdah 6 tơdrong đei jơnei ang hơdah mă Đảng ƀô̆ Khul linh hlôi jang đei lơ̆m jăl jang ou ki, lơ̆m noh đei tơdrong pơdrơ̆ng 6 grŭp tơdrong pơjing khul linh pran kơtang gah chinh trĭ đei sơkơ̆t hơdah lơ̆m Tơchơ̆t Hop akŏm Đảng ƀô̆ Khul linh 'măng mă 11, Kuân uy  Trung ương hlôi pơgơ̆r chih akŏm lơ trong pơm jang kăp gĭt, trŏ ƀlep hăm tơdrong kăl hơtŏk tơ-iung hrei ou.

Mă kăl, đe kang ƀô̆ khul linh hơnơ̆ng jing khul dơnơm, yuk hơlou lơ̆m tơdrong tang găn păng tơjră 'mi kial, pơrang jĭ pơrăm, chơ chă tơgŭm dŏng sar bar; ưh kơ hli tơnap tap, kơchăng năm truh tơ̆ dôm hơnih hli hlơt vă chă tơgŭm dŏng, vei lăng sơđơ̆ng tơdrong hơrih mŭk drăm kon pơlei, lơ̆m teh đak păng tơ̆ teh đak đe hloi. Tổng Bí thư pơgơ̆r, dah hơtŏk pơjing khul linh kon pơlei kăch mang, gơh hơgei hơbĕch hơbal. Lơ̆m noh, dôm tơdrong tơm “kăch mang, hơbĕch hơbal, gơh hơgei” hlôi hơnơ̆ng đei hơtŏk ling lang lơ̆m hloh 80 sơnăm tơ-iung pơjing, vơ̆ pran kơ khul linh; mă lei athei pơtoi đei hơtŏk kơtang, iŏk yua tơnăp hloh dơ̆ng lơ̆m jăl 'nao dang ei.