Vang hop akŏm đei ƀok Trần Tuấn Anh, Bơngai jang lơ̆m Anih tơm Chĭnh trĭ, Kơdră Anih jang Mŭk drăm Trung ương, tang măt dôm anih tơm, anih jang, kơdră chĕp kơ̆l 5 dêh char Tây Nguyên, dôm bơngai joăt jang mŭk drăm, bơngai jang khoa hŏk, dôm anih mơdro sa. Tơ̆ hop akŏm, dôm bơngai tang măt hlôi tơ păt tơ ƀôh ăn dôm tơdrong oei đei ưh kơ ‘lơ̆ng lơ̆m vei lăng hơtŏk tơ iung bri đơ̆ng Tây Nguyên hrei ‘nâu. ‘Noh jĭ teh bri đei tơ jur hrĕnh yua đơ̆ng tơdrong phă bri, tơ gar iŏk teh bri, koh iŏk ‘long bri glăi.

Tơdrong tơ jră bơngai bơ̆ jang vei lăng bri hơ nơ̆ng đei ƀôh kơ tang hăm tơdrong roi ‘năr roi dêh. Tơdrong jang tơ roi tơbăt krao hơvơn mă đơ̆ng bơ̆jang hơ nơ̆ng ră mă lei iŏk yua tam mă ‘lơ̆ng.... Dôm nơ̆r pơma dơnuh đei tơ roi tơ̆ hop akŏm hlôi akŏm lơ̆m dôm tơdrong găh hơlen lăng trong jang tơ gŭm, khôi luơ̆t teh tơlĕch ăn; tơ blang hơ dăh 1,2 trong jang tơ gŭm pơm tơdrong ‘lơ̆ng pơ trŭt, hơtŏk ‘lơ̆ng đei yua vei lăng păng hơ tŏk tơ iung bri.