Hop akŏm đei hơnăn “Kơ yuơ tơdrong atŏk tơ iung kơjăp ‘lơ̆ng păng tôm tong” hăm vang năm đơ̆ng hlŏh 60 tơring kơ ƀar teh đak atŭm hăm rim khul bơ̆ jang, rim hơnih mơdro sa.

Pơgơ̆r blŭng hop akŏm, Ƀĭ thư Đảng pơlei tơm Hà Nội Đinh Tiến Dũng tơbăt, truh dang ei hlôi đei hloh 38 tơring kơ Phalăng păng 18 dêh char, pơlei tơm kơ Việt Nam vang jang hơdoi, hăm 240 tơdrong vă jang ƀar păh rim tơring ƀar teh đak lơ̆m lơ tơdrong jang nhen Tơdrong jang pơgang, pơtho pơhrăm, vei răk tơƀăk mong mŭk drăm gĭt kăl sơ̆ ki, Khul pơma nơ̆r Phalăng, atŏk tơ iung tơring chŏh jang sa, atŏk tơ iung kơjăp ‘lơ̆ng… Iung pơma tơ̆ hop akŏm, Kơ iĕng Thủ tướng Trần Lưu Quang hôn bơnê kơtang trong tơlĕch pơgơ̆r kơ Hop akom “Jang hơdoi ƀar păh rim tơring hơyak pran hơmet pơ ‘lơ̆ng, atŏk tơ iung kơjăp ‘lơ̆ng tôm tong đơ̆ng rŏng jĭ hơbuh Covid-19”, hôn bơnê kơ Hà Nội hlôi đei trong tơchăr hop akŏm gĭ kăl au. ‘Nau jing mĭnh lơ̆m dôm trong jang kăl hloh vă atŏk kơtang jang hơdoi ƀar păh rim tơring păng kon pơlei ƀar teh đak yak ngôi dih băl.