Pơgê brei (29/8), tơ̆ Hnam hôp Diên Hồng, Hnam Quốc hội, Đảng Grŭp dôm Anih jang kơ Trung ương pơgơ̆r hơdai hăm Anih pơvih ăn Kơdră teh đak, Anih pơvih ăn Quốc hội, Hnam hŏk Chính trị quốc gia Hồ Chí Minh păng Hnam kơmăy in kơsơ̆p hla ar Chính trị quốc gia Tơdrong tơpă pơgơ̆r Hop akŏm khoa hŏk “55 sơnăm bơ̆ jang kiơ̆ Nơ̆r tơtă đơ̆ng Ƀok Hô lơ̆m dôm anih jang kơ Trung ương (1969 - 2024)”.

Pơma tơ̆ hop akŏm, Kơdră Quốc hội Trần Thanh Mẫn pơma hơdăh, 55 sơnăm âu ki, đon tơchĕng păng Nơ̆r tơtă đơ̆ng Ƀok ling lang năm hơdai hăm hơdrĕch hơdrung, tơƀôh trong chong glung đĭ đăng Đảng, đĭ đăng kon pơlei, đĭ đăng khul linh bơ̆n minh jơhngâm hăm tơdrong jang kăch mang ‘lơ̆ng hơiă đơ̆ng Ƀok, ‘moi kiơ̆ tơdrong jang kăch mang ‘lơ̆ng hơiă, gơh hơgei mă Ƀok hlôi ‘măn đĭ chăl arih plang jơhngâm.

Tơ̆ hơnăp kơnh, Kơdră Quốc hội athei, hơnơ̆ng ‘moi kiơ̆ tơdrong chĕp kơ̆l pơgơ̆r đơ̆ng Trung ương Đảng, Anih tơm Chinh trĭ, Ban Bí thư tơlĕch jang tôm tơdrong, hrơ̆ch ‘lơ̆ng, hơmet pơ ‘lơ̆ng hlŏh dơ̆ng tơdrong tơiung pơjing Đảng, vei kơjăp trong chĕp kơ̆l kon pơlei pơm tơm, pơm hơtŏk hơnăp chĕp kơ̆l pơgơ̆r, bơ̆ jang chĭnh trĭ đơ̆ng anih jang đảng, adrol hlŏh jĭ akŏm jơhngâm bơ̆ jang ‘lơ̆ng tơdrong jang chinh trĭ đon tơchĕng, tơjră hăm dôm nơ̆r pơma kư̆ kă, ưh kơ trŏ đơ̆ng hơyăt, vei kơjăp đon tơchĕng đơ̆ng Đảng.