‘Năr brei (21/8), Anih jang Mặt trận Tổ quốc Việt Nam dêh char Đắk Nông pơgơ̆r hop akŏm Bơngai tang măt ‘măng mă V, jăl jang 2024-2029 hăm hơnăn hơtŏk ‘lơ̆ng hơnăp jang tơm chĭnh trĭ đơ̆ng mặt trận Tổ quốc Việt Nam; jang kiơ̆ kon pơlei pơm tơm, hơtŏk loi dơ̆ng jơhngơ̆m pran tơgoăt tơgoăl đĭ đăng kon pơlei; tơplih ‘nao hơtŏk ‘lơ̆ng đei yua tơdrong jang mặt trận, tơgop pơjing Đắk Nông pơdrŏng ‘lơ̆ng, joh ayŏ. Ƀok Nguyễn Phú Nghĩ, Phŏ Kơdră Anih jang Mặt trận Tổ quốc Việt Nam dêh char Đắk Nông pơma hơdăh, Hop akŏm ‘măng mă V hlôi tơlĕch ăn lơ trong jang ‘nao, pơm liơ vă Mặt trận Tổ quốc Việt Nam rim tơring lơ̆m dêh char hơtŏk hơnăp jang, mă kăl lơ̆m tơdrong jang dăr hơlen păng pơma tơblang ăn tơbôl.

Hop akŏm hlôi pơma dơnuh rơih đei 69 Bơngai jang lơ̆m Anih jang Mặt trận Tổ quốc Việt Nam dêh char Đắk Nông jăl V jăl jang 2024-2029. Tơ̆ hop akŏm ‘măng mă mônh, dôm bơngai jang lơ̆m khŭl hlôi pơma dơnuh rơih yă Hà Thị Hạnh, Bơngai jang lơ̆m Khŭl chĕp kơ̆l pơgơ̆r Anih jang Đảng dêh char, Kơdră khŭl krao hơvơn kon pơlei pơm Kơdră Anih jang Mặt trận Tổ quốc Việt Nam dêh char Đắk Nông jăl ‘nao. Hop akŏm kŭm pơma dơnuh rơih khul tang măt vang Hop akŏm Bơngai tang măt Lơ̆m teh đak Mặt trận Tổ quốc Việt Nam ‘măng mă X ‘noh đei 6 ‘nu bơngai tang măt tơpă, 2 ‘nu bơngai tang măt hơmet hiă.