Iung pơma tơ̆ hop akŏm, Kơdră chĕp pơgơ̆r Kuŏk hô̆i Trần Thanh Mẫn tơbăt, Khul pơgơ̆r Hop akom hlôi sơng iŏk đei 49 ƀai chih păng hlôi akŏm, pơm tơlĕch jing kơsơ̆p hla bơar kăl. Rim nơ̆r tơgop, pơma dơnuh kơtă tơ̆ hop akŏm tôch trŏ lăp, tơbăt hơdăh jăl trong 80 sơnăm pơjing, atŏk tơ iung kơ Kuô̆k hô̆i Việt Nam. Lơ nơ̆r tơgop tơ̆ Hop akŏm pơma hơdăh tơdrong hơnơ̆ng kiơ̆ yok trong tơchăr trŏ lăp lơ̆m 80 sơnăm ou ki vă pơm hơtŏk bơ̆ jang ‘lơ̆ng, jơnei lơ̆m tơdrong bơ̆ jang trŭh ou kơnh, ƀơ̆t măt ‘noh tơgop kơtang ăn Hop akom tih Đảng ƀô̆ rim hơnih păng Hop akom tih Kơdră tang măt lơ̆m teh đak ‘măng mă 14 kơ Đảng; hơmet ăn pôk rơih Kuô̆k hô̆i jăl 16, pôk rơih kơdră tang măt Jơnŭm vei lăng kon pơlei jăl jang 2026-2031; pơgơ̆r rim tơdrong jang ‘lơ̆ng hơ iă Tơbăt 80 sơnăm-Năr Pôk rơih blŭng a Kuôk hô̆i Việt Nam.