Pơ gê (2/4), tơ̆ dêh char Khánh Hòa, Hop akŏm tơbăt hơdăh tơdrong jang proh hơmet trong jang păng tơlĕch trong jang tơmơ̆t jên jang kơ dêh Khánh Hòa sơnăm 2023 yua đơ̆ng Anih tơm tơlĕch nơ̆r sơkơ̆t păng tơmơ̆t jên jang jang hơdai hăm dêh char Khánh hòa hlôi đei pơ gơ̆r. Thủ tướng Teh đak Phạm Minh Chính vang truh păng iung pơma pơtho tơƀôh. Hop akŏm tơbăt hơdăh tơdrong proh hơmet trong jang păng tơlĕch trong jang tơmơ̆t jên jang kơ dêh char Khánh Hòa sơnăm 2023 ‘noh jĭ 1 tơdrong jang tôch kơ ‘lơ̆ng gĭt kăl, ƀlep lơ̆m năr tơbăt 370 sơnăm pơ jing păng hơ tŏk tơ iung dêh char Khánh Hòa păng 48 sơnăm Năr rơngei Khánh Hòa.

Găh trong vă jang, hơnăp jang tơm tơ̆ hơnăp kơnh, Thủ tướng Phạm Minh Chính athei, Khánh Hòa jăh tơ tĕnh jang đang, tơlĕch jang đei yua dôm tơdrong jang proh hơ met ming, mă loi ‘noh jĭ dôm tơdrong jang proh hơmet ming gĭt kăl hlôi đei kĭ ăn ‘nao đei tơbăt hơdăh, vă vei lăng drơ̆ng 1 nơ̆r, vei sơđơ̆ng tơdrong jang hơdai, hrơ̆ch 1 ‘măng, drơ̆ng 1 nơ̆r, đei yua păng hơ tŏk tơ iung kơ jăp hăm trĕng lăng đunh đai, trong vă jang hơ tŏk tơ iung akŏm, jang hơdai tơring, hơtŏk tơmam ‘lơ̆ng, đei yua, hơtŏk tơ iung pran kơ tang mŭk drăm, tơ pôl păng vei lăng cham char.