Pơgơ̆r lơ̆m 2 năr (23-24/9), Năr iung jang xa tơplih ‘nao rơgei kơ dêh char Đắk Lắk sơnăm 2024 (Techfest Đắk Lắk 2024) đei lơ tơdrong jang nhen: pơdă tơƀôh, roi tơbăt dôm tơdrong vă jang, tơmam đơ̆ng iung jang xa đei, tơmam OCOP, kơmăy kơmŏk tơring tơrang, pơvih ăn chă tơmang lăng; 1,2 hop akŏm găh iung jang xa tơplih ‘nao rơgei, iung jang xa rơgŏh ‘lơ̆ng, trong tưk tơiung tơdrong iung jang xa găh lơ tơdrong, lơ khul grŭp… ‘Nâu jĭ tơdrong gĭt kăl đei pơgơ̆r rim sơnăm, vă pơjing tơdrong ‘lơ̆ng chă tơƀâp, pơma nuh đơ̆ng khul tĕch mơdro, chă trong tơmât jên jang hơdoi, pơih xă anih tĕch mơdro.

Lơ̆m Năr iung jang xa tơplih ‘nao rơgei kơ dêh char Đắk Lắk sơnăm 2024, Anih vei lăng jang kơmăy, tĕch mơdro dêh char Đắk Lắk pơgơ̆r Hop akŏm tơlĕch trong tĕch tơmam sơnăm 2024. Hop akŏm vă tưk tơiung jơhngâm pran păng hơtŏk jơhngâm đon iung jang xa, tĕch mơdro lơ̆m kon pơlei hăm dôm tơdrong iung jang xa tơplih ‘nao rơgei, tơguăt trong jang hơdoi đơ̆ng dôm bơngai jang khoa hŏk, bơngai vei lăng, tơpôl bơngai tĕch mơdro vă tơgŭm, tơlĕch trong atŏk tơiung tơmam jang đei.

Vang truh hăm hop akŏm, ƀok Đường Văn Quân, Kơdră chĕp kơ̆l Công ty jang hơdoi kơchơ̆t bek ‘lơ̆ng Cao Nguyên ăn tơbăt: “Lơ̆m tơdrong jang ‘nâu inh ‘mĕh roi tơƀôh ăn anih jang ‘nao iung jang xa dăh mă pơtơm đei tơmam vă tĕch tơ̆ ‘ngoăih vă đe sư ƀôh dôm hơyak vă hơnhăk tĕch tơmam tơ̆ ‘ngoăih thoi yơ. Đơ̆ng đon tơchĕng, in ƀao ƀi tơmam, dôm hla ar đei ƀơm truh găh tơmam mưh đe sư ‘mĕh hơnhăk tĕch tơ̆ ‘ngoăih. Inh đei 1 khul tơpôl vă tơgŭm pơtho pơhrăm đĕch, ưh iŏk jên”.

Ƀlep ƀât ‘măng mă âu, tơ̆ plt Buôn Ma Thuột oei pơgơ̆r hloi hop akŏm Tưk tơiung trong iung jang xa, tơplih ‘nao rơgei kơ dêh char Đắk Lắk. Vang truh hop akŏm, PGS.TS. Lê Đức Niêm, Phŏ Hiê̆u trơng Hnam trưng Đăi hŏk Tây Nguyên akhan, tơpôl iung jang xa tơplih ‘nao rơgei tơ̆ Đắk Lắk oei dơ̆ng ƀât tăl 2, jĭ tăl pơih blŭng, tam mă hơmet kơjăp ‘lơ̆ng. Yoa thoi noh, athei hơnơ̆ng hơmet ming dôm tơdrong kăl, chih pơjing dôm trong jang găh jên hu, pơtho pơhrăm...

“Blŭng a ‘noh athei hơmet mă tôm, đei tôm tơdrong kăl, hnam trưng đăi hŏk, anih tĕch mơdro, anih jang tơm, dôm anih jang kơpal, kăl loi jĭ tơdrong tơƀôh trong jang đơ̆ng dêh char, lơ̆m noh đei lơ bơngai jang tơnăp vă tưk tơiung khul iung jang xa tŏk pran ‘lơ̆ng. Mă 2 ‘nŏh jang mă ‘lơ̆ng, rim tơdrong ưh gơ̆h jang vă pơtrŏ đĕch, athei mât mă hlom tơ̆ yăn âu, tơgŭm ăn dôm anih tĕch mơdro jang tŏk. Tơdrong tưk tơiung tơpôl iung jang xa ‘lơ̆ng ‘nŏh anih tĕch mơdro gô đei trong jang xa kơdih lơ̆m tơpôl ‘nŏh”.

Lơ̆m dôm năr iung jang xa tơplih ‘nao rơgei kơ dêh char Đắk Lắk sơnăm 2024, dôm anih jang hlôi ming pơdă, roi tơƀôh vă jê̆ 150 kơdeng tơmam đơ̆ng iung jang xa rơgei, tơmam OCOP, kơmăy kơmŏk tơ̆ tơring, tơmam pơvih ăn chă tơmang lăng đơ̆ng dôm anih jang xa, tĕch mơdro lơ̆m dêh char.

Ƀok Nguyễn Tuấn Hà, Phŏ Kơdră chĕp kơ̆l Anih vei lăng kon pơlei dêh char Đắk Lắk akhan, tơdrong jơnei đơ̆ng năr iung jang xa ‘nŏh jĭ tơdrong vă pơlung jơhngâm đon iung jang xa đơ̆ng kon pơlei, hŏk tro, sinh viên. Tưk tơiung đon tơchĕng tơplih ‘nao rơgei, pơjing khul tơpôl iung jang xa tơplih ‘nao rơgei kơ dêh char roi đunh roi pran kơjăp, lăp hăm yăn âu păng đei yoa ‘lơ̆ng.

“Dôm hop akŏm hlôi pơma nuh tôch hơlen găh lơ tơdrong, nhen hop akŏm ƀơm truh tơdrong tơplih ‘nao rơgei ‘nŏh Hnam trưng Đăi hŏk Tây Nguyên hlôi năng kăl truh tơdrong tơplih ‘nao rơgei đơ̆ng hŏk tro, sinh viên, oei Anih tơlĕch nơ̆r sơkơ̆t tơmât jên jang ‘nŏh tơplih ‘nao rơgei tơ̆ anih tĕch mơdro, HTX. Mưh pơma nuh tôch hơlen thoi noh ‘nŏh tơdrong iŏk đei kŭm tôch ‘lơ̆ng. Dôm tơmam đơ̆ng đe bôl boăl iung jang xa, tĕch mơdro roi đunh roi ‘lơ̆ng păng roi đei yă, păr ang truh tơ̆ jơ̆p kon pơlei pơla”.

Gơ̆h pơma, dôm tơdrong tơgŭm iung jang xa tơ̆ dêh char hlôi tưk tơiung đei tơdrong ‘lơ̆ng, vang tơgop pơjing khul tơpôl iung jang xa tơ̆ Đắk Lắk yak tŏk kiơ̆ trong jrŭ xă, păr ang jơ̆p jang, tơiung đei jơhngâm đon hưch hanh mưh iung jang xa đơ̆ng kon pơlei.