Tơdrong pơkăp vă ming man jăl trong tih Tân Phú - Bảo Lộc ataih pơhlom 66km, lơ̆m noh 11km găn tơring teh kơ apŭng Tân Phú, dêh char Đồng Nai păng 55km lơ̆m tơring teh kơ dêh char Lâm Đồng. Tơdrong pơkăp vă jang đei jên axong kiơ̆ jăl noh 17.200 tih hlj, lơ̆m noh jên mong teh đak axong 6.500 tih hlj (jên mong trung ương 2.000 tih hlj, jên mong kơ dêh char Lâm Đồng 4.500 tih hlj), jên đơ̆ng tơ-‘ngla iŏk ming man 1.605 tih hlj, oei dôm to noh jên chă hơvơn tơra.

‘Nâu jing tơdrong pơkăp vă jang lơ̆m grŭp A kơyuơ Anih jang vei lăng kon pơlei dêh char Lâm Đồng iŏk jang kiơ̆ xơnong anih jang kơpal kơ Teh đak axong jang kiơ̆ pơkăp vă jang kơyuơ Anih jang Đèo Cả pơm kơdranh. Jăl mă 1, jăl trong tih âu đei drơh xă 17m hăm  4 tong gre năm hadoi, pơkăp anih gre dơ̆ng mưh đei tơdrong kăl, hăm khei năr xơkơ̆t hơdăh gô keh đang ăh xơnăm 2026. Jăl mă 2 gô axong man keh đang jăl trong tih, drơh trong xă 22m, đei 4 tong gre năm hadoi păng 2 tong gre dơ̆ng hadoi mưh đei tơdrong kăl, kơchĕng gô keh đang đơ̆ng rŏng kơ xơnăm 2035.

Ƀok Lê Quỳnh Mai, Phŏ Kơdră pơgơ̆r găh jên jang kơ Anih jang Đèo Cả ăn tơbăt, Anih jang vei lăng kon pơlei dêh char Lâm Đồng hlôi pơjao ăn iŏk jang chă hơlen Chih tơroi tơdrong gơh jang păng tơdrong âu tŏk bŏk tenh kuăng keh đang. Găh trong, dôm anih trong tơkuh băl, trong hơlŭng, trong găn tơring kon pơlei oei xa... rok kiơ̆ jăl trong tih hlôi đei drơ̆ng nơ̆r hơdăh. Ƀok Lê Quỳnh Mai tơroi: “Lơ̆m khei 7/2023 noh Anih jang Đèo Cả gô pơtruh ăn Anih jang vei lăng kon pơlei dêh char Lâm Đồng tơdrong chih tơbang pơkăp vă ming man. Pơtoi kơ noh Anih jang vei lăng kon pơlei dêh char Lâm Đồng pơtruh ăn Anih tơm jang găh Trong nơnăm păng Jơnŭm pơgơ̆r hơlen tơchơ̆t gơh jang hăm tơdrong pơkăp vă jang âu. Hơpơi ‘meh truh ăh khei 9/2023 gô keh đang tơdrong tơchơ̆t noh vă Anih jang vei lăng kon pơlei dêh char Lâm Đồng kĭ pơkăp vă jang păng pơtơm iŏk ming man hloi”.

Atŭm hăm jăl trong tih Tân Phú - Bảo Lộc, Anih jang vei lăng kon pơlei dêh char Lâm Đồng adoi hơtŏk pran tơdrong man jăl trong tih tơroh hadoi noh Bảo Lộc – Liên Khương ataih truh 74km, pơkăp hăm 4 tong gre năm hadoi, hăm kơsô̆ jên pơkăp vă ming man noh 19.521 tih hlj. Lơ̆m noh, jên mong Teh đak tơmơ̆t jang hloh 7.760 tih hlj, dôm anih axong ming man 11.760 tih hlj, oei dôm to noh jên chă hơvơn tơra vang jang nai. Ƀok Hoàng Việt Lâm, Phŏ Kơdră Anih Pơkăp axong tơdrong vă jang Lâm Đồng ăn tơbăt, jăl trong tih âu adoi oei hăt hot keh đang dôm hla bar tơchơ̆t kăl vă dăh hrôih iŏk ming man: “Pha hăm tơdrong pơkăp vă man jăl trong tih Tân Phú – Bảo Lộc, jăl trong tih Bảo Lộc – Liên Khương jing tơdrong pơkăp vă jang oei hloi lơ̆m tơring teh kơ dêh char Lâm Đồng. Kơyuơ noh anih jang kơpal noh Anih jang vei lăng kon pơlei dêh char Lâm Đồng păng anih jang kĭ tơchơ̆t axong ming man noh Jơnŭm jang vei lăng kon pơlei dêh char Lâm Đồng. Dang ei tơdrong pơkăp vă jang adoi oei hơlen chih hla bar tơchơ̆t tơdrong iŏk jang”.

Dôm tơdrong pơkăp vă man jăl trong tih Tân Phú – Bảo Lộc păng Bảo Lộc - Liên Khương jing jăl trong dơnơm, tơroh vih vơ̆t tĕch pơdro kơ dêh char Lâm Đồng hăm pơlei tơm HCM păng dôm dêh char găh Pơbăh. Ƀơ̆t dôm jăl trong tih âu keh đang gô pơjing jơhngơ̆m pran tih tên vă hơtŏk mŭk drăm – tơpôl kơ Lâm Đồng păng dôm dêh char lơ̆m tơring hơtŏk tơ-iung.