Tơ̆ anih jang ming man kơsô̆ 3, găh jăl 3 trong gre kơdâu hrĕnh Khánh Hòa – Buôn Ma Thuột, Công ty tơm ming man kơsô̆ 1 krao akŏm hlŏh 60 ‘nu ki sư, công nhân kŭm hăm 60 tŏ gre, kơmăy lơ kơloăi akŏm jơhngâm bơ̆ jang. ‘Nhŏng Nguyễn Đình Lợi, kăn ƀô̆ ki thuơ̆t tơ̆ âu, tơroi: “Bơ̆ jang kiơ̆ nơ̆r pơtho đơ̆ng Thủ tướng, ‘nŏh lăp pơma găh trong bơ̆ jang đĕch ưh đei pơma kơdŭn, ‘mi pă lăng prăng pă pơdơ̆h bơ̆ jang 3 ca 4 khul hlôi đei tơlĕch jang tôch trong gre kơdâu hrĕnh Khánh Hòa – Buôn Ma Thuột, kơlih thoi noh mă ‘nhŏng oh kăn ƀô̆, bơngai jang ki thuơ̆t, công nhân, bơngai huơ̆r gre, huơ̆r kơmăy adrin jang kiơ̆ ‘lơ̆ng nơ̆r pơtho đơ̆ng Thủ tướng. Dôm tơdrong pơmat tat tơ̆ anih jang nhen tŏ ‘mi ưh sơđơ̆ng ‘nŏh kiơ̆ đon pơhnŏng tôch ai ‘nŏh ƀât hơnih ‘mi iĕ "athei năng nhen ưh đei ‘mi, tơdăh ‘mi tih ‘nŏh năng nhen ‘mi iĕ, oei tơdăh ‘mi tih dêh hnang ‘nŏh chô̆ ƀao kak pơm bơbŭng pĕng ‘mi vă bơ̆ jang.”

Iŏk jang tơdrong jang man 16,5Km trong tơ̆ dêh char Đắk Lắk păng 22km găh dêh char Khánh Hòa, ƀok Nguyễn Viết Hải, Kơdră vei lăng Khul jang kơ Grŭp jang Sơn Hải ăn tơbăt, grŭp jang hlôi akŏm jơhngâm, jang măng, jang năr adrin jang đang adrol kơ năr hơgăt: “Nhôn pơkăp Tơdrong jang pơm trong Nha Trang – Buôn Ma Thuột jăl 3 vă jang đang lơ̆m sơnăm 2025, vă akhan jang đang adrol ƀiơ̆ 1 sơnăm pơting hăm tơdrong hơgăt hlôi đei pơma nuh ‘nŏh sơnăm 2026. Păng tơdrong jang Nha Trang – Buôn Ma Thuột jăl 1 kơdâu klĕch Khánh Hòa 22km tơƀưh đơ̆ng trong gre kơsô̆ 1 truh tơ̆ trong gre kơsô̆ 26 nhôn kŭm pơkăp vă tơjur ƀiơ̆ khei ‘năr bơ̆ jang, adrin jang đang lơ̆m sơnăm 2025.”

Tơdrong jang pơm trong gre kơdâu hrĕnh Buôn Ma Thuột-Khánh Hòa kơjung 117,5km, đei 3 jăl, đei tơlĕch jang đơ̆ng khei 6 sơnăm 2023, tơchĕng adrol vă jang đang đĭ đăng lơ̆m sơnăm 2026. Truh dang ei, jăl trong mă 1 yoa Anih vei lăng kon pơlei dêh char Khánh Hòa pơm tơ ‘ngla tơmât jên jang, hlôi jang đei kơjă 20%; Jăl 2 yoa Anih tơm vei lăng trong nơnăm pơm tơ ‘ngla tơmât jên jang, akŏm đĭ đăng kơjă ming man đei vă jê̆ 7%; Jăl mă 3 yoa Anih vei lăng kon pơlei dêh char Đắk Lắk pơm tơ ‘ngla tơmât jên jang iŏk đei hlŏh 15% kơjă ming man. Ƀok Phạm Ngọc Nghị, Kơdră vei lăng kon pơlei dêh char Đắk Lắk ăn tơbăt, Tơdrong jang bơ̆ jang lăp hăm khei ‘năr hơgăt kiơ̆ Tơdrong tơchơ̆t kơsô̆ 89/NQ-CP ‘năr 25/7/2022 đơ̆ng Khul kơdră teh đak:

“Jang kiơ̆ ‘măng pơjei băl bơ̆ jang yoa Thủ tướng teh đak tơlĕch, dêh char Đắk Lắk pơkăp, hơnơ̆ng bơ̆ jang pran hlŏh dơ̆ng lơ̆m tơdrong vei lăng, hơtŏk tơdrong dăr lăng, pơjing tơdrong hiôk hian hlŏh vă dôm anih bơ̆ jang akŏm jơhngâm jang kĕh đang tơdrong jang ‘nâu. Inh lui, hăm tơdrong chĕp kơ̆l pơgơ̆r tôch pran kơjăp đơ̆ng Thủ tướng teh đak; tơdrong tơgŭm tôch pơnĕh đơ̆ng dôm Anih tơm, anih jang kơpal kơ Trung ương; tơdrong adrin đơ̆ng dôm anih jang, khul grŭp, tơring tơrang đei ƀơm truh păng tơdrong vang tơgŭm đơ̆ng kon pơlei dôm hơdrĕch hơdrung lơ̆m dêh char, ưh jor tơdrong jang jăl 3 gô jang đang lơ̆m sơnăm 2025 păng đĭ đăng jăl trong đei tơmât jên jang tơ̆ Trong gre kơdâu hrĕnh Khánh Hòa - Buôn Ma Thuột gô jang đang trŏ hăm khei ‘năr hơgăt.”

Hăm tơdrong pơngơ̆t, pơtho tơƀôh tôch ‘lơ̆ng đơ̆ng trung ương truh tơ̆ tơring, đon kơchăng, adrin tôch ai, bơ̆ jang tôch tơnăp đơ̆ng bơngai tơmât jên jang păng dôm anih ming man, hơmĕng Tơdrong jang pơm Trong gre kơdâu hrĕnh Khánh Hòa – Buôn Ma Thuột gô jang kĕh păng hrôih hlŏh khei ‘năr hơgăt, pơm lăp hăm tơdrong ‘mĕh vă, đon gô chang đơ̆ng kon pơlei./.