Tơ̆ ‘măng pơma điê̆n thoăi, ƀar ƀok kơdră chơt hơ-iă pơgơ̆r pơma điê̆n thoăi kơpal vă pơma đam gah tơdrong hơtŏk jang Tơbôl tôm tơdrong Việt Nam - Hàn Quốc păng dôm tơdrong mă 2 pah atŭm tơrĕk truh.

Kơdră teh đak Hàn Quốc sơkơ̆t hơdah, lăng tơgĭt sơnong jang đơ̆ng Việt Nam lơ̆m tơdrong tơlĕch jang kiơ̆ dôm tơchơ̆t đơ̆ng Hàn Quốc tơ̆ tơring. Ƀar ƀok kơdră drơ̆ng nơ̆r hơtŏk hloh dơ̆ng tơbôl jang hadoi hăm dih băl păng lui ngeh gah chĭnh trĭ kiơ̆ tơdrong akŏm pơma dơnuh kơpal păng dôm tơchơ̆t jang đơ̆ng Đảng, Jơnŭm pơgơ̆r teh đak, Kuôk hô̆i păng kon pơlei 2 teh đak; hơtŏk jang hadoi gah tơdrong vei sơđơ̆ng tơpôl; hơtŏk jang hadoi gah mŭk drăm, tĕch pơdro păng asong jang roi năr roi đei jơnei, hơtŏ hơnơ̆ng, kơjăp sơđơ̆ng. Ƀar pah drơ̆ng nơ̆r gô hơtŭm hơtŏk tơmam tĕch răt kơ 2 pah tŏk 150 tih đôlar ah sơnăm 2030.