Nơ̆r athei chih hơdăh, dôm khul linh công an, khul linh ƀô đô̆i, khul vei lăng tĕch mơdro, hải quan, vei vei lăng tơring sơlam... athei kơchăng băt hơdăh rim tơdrong, tơtom chă ƀôh, sek tơlang ‘lơ̆ng dôm tơdrong pơm glăi, ưh gơ̆h lê̆ đei tơdrong krê ưh ê.

Thủ tướng pơma hơdăh, hơtŏk tơdrong dăr joang, vei lăng sơđơ̆ng tơ̆ trong gre, tang găn unh xa, đôh, tơdrong sar bar, tơdrong yoch, pơm glăi lơ̆m tơpôl, vei lăng kơjăp ‘lơ̆ng ăn rim tơdrong chinh trĭ, jŏh ayŏ kơ dŏ xoang, chă tơmang, ngôi pơchơt đơ̆ng kon pơlei. Dôm tơring athei hơmet trong tơjră hăm tŏ ‘mi kial kơnê̆, vei lăng ‘lơ̆ng tơdrong arih păng tơmam drăm. Thủ tướng athei dôm anih jang đei ƀơm truh roi tơbăt mă tơtom rim tơdrong, vang tơgop vei lăng kơjăp ‘lơ̆ng chinh trĭ, tơdrong sơđơ̆ng lơ̆m tơpôl, vă kon pơlei lơ̆m teh đak gơ̆h sơng Têt Rơngei hiôk hian, pơjing đei đak kơdih chơt hơiă ‘nă hal.