Đơ̆ng sơnăm 2018 truh dang ei, dêh char Đắk Lắk hlôi tơlĕch ăn lơ hla ar chih hơdăh dôm tơdrong jang tơgŭm iung jang sa tơplih ‘nao gơh hơgei kơ Teh đak truh sơnăm 2025, pơjing păng tơmơ̆t lơ̆m Tơdrong jang iung jang sa păng Hơnih kơtơ̆ng ang điện tử iung jang sa tơplih ‘nao gơh hơgei kơ dêh char; hơnơ̆ng pơgơ̆r dôm ‘măng “Cheh phe bơngai mơdro sa” vă tơgŭm tơpôl iung jang sa.

Vang truh hop akŏm, PGS.TS. Lê Đức Niêm, Phŏ Kơdră vei lăng Hnam trưng Đại học Tây Nguyên akhan, trong iung jang sa tơplih ‘nao gơh hơgei tơ̆ Đắk Lắk tŏk bŏk tơ̆ jăl kơsô̆ 2, jĭ jăl kơsô̆ ‘lơ̆ng, tam mă jang pơkeh. Yua thoi noh, kăl kơ hơnơ̆ng jang pơkeh găh kon jên, pơtho pơhrăm... Dôm bơngai tang măt kŭm tơƀôh ăn dôm tơdrong tam mă ‘lơ̆ng dang ei đơ̆ng trong iung jang sa tơplih ‘nao gơh hơgei tơ̆ Đắk Lắk, đơ̆ng noh tơlĕch ăn dôm trong jang vă hơnơ̆ng hơtŏk tơiung trong jang kiơ̆ ƀlep trong vă jang.