Pơtơm truh hăm 1 năr hŏk ‘nao, thây kô păng 930 ‘nu oh hŏk tro tơ̆ Hnam trưng jăl mônh Quang Trung, plt Kon Tum, dêh char Kon Tum ‘măn 10 pơnĭt năng ngôi lơ hnam trơng đak lơ̆p đei kuay iŏk đơ̆ng tơring đak lơ̆p tơ̆ dôm dêh char, plt găh Tu: “Năr ‘nâu kô kŭm hăm đe kon năng 1 jăl phim kuay tơƀôh kon pơlei tơring găh Tu oei pŭ hiong răm đơ̆ng ‘mi kial, đak lơ̆p vă gơ̆h ƀôh tơdrong hiong răm tôch lơ đơ̆ng kon pơlei tơ̆ tơring găh Tu”.

 Oh Nguyễn Hữu Bảo Anh, hŏk tro lăm 4A, tơroi: “Đơ̆ng rŏng năng phim kon tôch mơnat kơ kon pơlei tơ̆ tơring găh Tu bơ̆n, athei pŭ tơdrong pơngot rơvĕt, tơngiĕt găng păng lăng ƀôh kơ kơtum kơtŏng ‘nhŏng oh kơdih lôch răm đơ̆ng đak hoch. Kon hơpơi ‘mĕh ‘mi kial jăl tôch vă tơring găh Tu jăh hiôk sơđơ̆ng dơ̆ng”.

Tơ̆ hơnăp tơdrong hiong răm, ơh sơ ‘ngon tôch dêh đơ̆ng kon pơlei tơ̆ tơring ‘mi kial, Khul thây kô vei lăng hnam trưng jăl mônh Quang Trung tơlĕch tơdrong vang tơra tơgop păng đei hŏk tro kŭm nhen mĕ ƀă hŏk tro vang tơgŭm tôch hơiă, mong đei jên tơmam tơgŭm tôch lơ. Pơm kơdih bì thư đơ̆ng hla ar hŏk, hăm chư chih “Gơih ăn tơring găh Tu” lơ̆m noh đei 200.000 hlak, oh Đỗ Hồng Anh, lăm 3C, pơma thoi âu: “Jên âu jĭ jên mă anih jang đe ƀă inh hơpăh ăn inh ƀât Tết Trung thu mă lei inh ƀôh lơ bơngai tơ̆ găh Tu pŭ răm đơ̆ng ‘mi tih đak lơ̆p ‘nŏh tôch pơmat kơna inh pơm phong bi ‘nâu vă gơih ăn rim bơngai. Inh hơpơi ‘mĕh tơring găh Tu ‘lơ̆ng hơlơ̆k dơ̆ng păng đak lơ̆p jăh hrơ̆ đĭ, ưh đei pơdui đunh”.

Lăp đơ̆ng rŏng 1 năr kơ tơlĕch, Hnam trưng jăl mônh Quang Trung, plt Kon Tum tơgop đei vă jê̆ 25 triu hlak jên; 114 kơthŭng mi tôm, đak nhă; 20 kơthŭng đak toh, ƀĕng keo; 8 blăh ao đônh; dang 400 blăh hơbăn ao kŭm hăm lơ tơmam yoa păng pơgang hai. Kô Đậu Thị Lan, Hiê̆u trơng Hnam trưng jăl mônh Quang Trung, ăn tơbăt đĭ đăng jên kŭm hăm dôm tơmam kăl đơ̆ng hŏk tro păng mĕ ƀă hŏk tro vang tơgop gô đei hnam trưng gơih ăn kon pơlei tơ̆ ttơring đak lơ̆p hrĕnh hlŏh. Kŭm kiơ̆ kô Đậu Thị Lan mơ̆n, tơdrong tôch kăp gĭt ‘nŏh kiơ̆ đơ̆ng tơdrong jang ‘nâu, đe oh hŏk tro đei pơtho tơƀôh, pơm hơtŏk jơhngâm đon ‘mêm băl, vang tơgŭm băl mưh tơƀâp tơdrong pơmat tat, hơnat hơnot:

“Tơ̆ hơnăp tơdrong hiong răm đơ̆ng ‘mi kial, đak lơ̆p tơ̆ tơring găh Tu mă dang ei kon pơlei oei pŭ lơ tơdrong răm, pơtho tơƀôh ăn đe oh găh jơhngâm đon ‘mêm mơnat băl păng vang tơgŭm băl ‘nŏh tôch gĭt kăl. Đe oh ƀôh kơdih kâu vang tơgop, vang tơgŭm tŏ sĕt tơmam kiơ ‘nŏh ăn kon pơlei tơ̆ tơring găh tu ‘nŏh tôch gĭt kăl. Hnam trưng tôch bơnê yoa iŏk đei tơdrong vang tơgŭm đơ̆ng mĕ ƀă hŏk tro păng đe oh găh jơhngâm đon ‘lơ̆ng”.

Tơ̆ plt Buôn Ma Thuột, dêh char Đắk Lắk pơgơ̆r lơ tơdrong jang gĭt kăl lơ̆m pơyan Trung Thu sơnăm ‘nâu, nhen: pơdă um rup “Unh đeng sơ nglŏng tơ̆k hơdăh tơdriong hơpơi ‘mĕh” đơ̆ng 63 dêh char, plt; et hơtŏk, hơpăh tơmam “Anih đŏk hla ar, pơtâp pơhrăm păng jang Đô̆i”, thi ming pơrŏ tơmam trung thu, pơm unh đeng; tơ̆k unh đeng, hơxoang prao.

Oh H’Kim Anh Niê, lăm 5C, hnam trưng jăl mônh Lê Lợi, tơ̆ apŭng Ea Kar, dêh char Đắk Lắk tơroi: “Năr ‘nâu oh đei truh hăm lơ tơdrong, oh ƀôh tôch hơiă mưh đei truh hăm 1 tơdrong jang tih thoi âu. Gơmăng hei oei iŏk đei lơ tơmam păng jên hŏk ƀŏng dơ̆ng, bơnê kơ đe ma đe duch vang tơgŭm ăn đe boăl đei tơdrong arih xa pơmat tat. Tơ̆ hơnô̆ kơnh oh vă adrin hŏk pơhrăm mă gơ̆h”.

Mŏ Nguyễn Phạm Duy Trang, Bí thư Khul kơdră chĕp kơ̆l Trung ương Đoàn, Kơdră vei lăng Khul hơioh Trung ương tơroi, kŭm hăm Đắk Lắk, lơ̆m pơyan trung thu sơnăm ‘nâu, Trung ương Đoàn vă pơjao 15.000 tơpu tơmam păng 330 kơ suơ̆t jên hŏk ƀŏng ăn đe hơioh tơ̆ lơ dêh char, plt; Pơjao 4 anih pơm ngôi ăn đe hơioh tơ̆ dôm dêh char Gia Lai, Đắk Nông, Lạng Sơn păng Cao Bằng. Tơgŭm jên măt păng tơmam yoa kăl ăn đe hơioh tơ̆ 15 dêh char, plt pŭ răm đơ̆ng ‘mi kial kơsô̆ 3 (‘mi kial hơbŭt Yagi). Akŏm đĭ đăng dôm tơdrong jang mong đei vă jê̆ 13 ti hlak jên.

“Jang kiơ̆ nơ̆r krao hơvơn đơ̆ng Ban bí thư Trung ương Đoàn, rim anih jang đoan, đô̆i, mă loi jĭ đe hơioh lơ̆m teh đak vang bơ̆ jang lơ tơdrong vă tơgŭm ăn đe hơioh tơ̆ dôm dêh char găh Tu. Dôm tơmam iơ iĕ ră mă lei sư hơnhăk ba tơdrong chơt hơiă, tưk tơiung dơ̆ng jơhngâm pran ăn đe oh ưh pŭn ai păng vei rong jơhngâm đon ‘mêm băl, tơgŭm băl lơ̆m tơpôl”.

Tơ̆ gơmăng ngôi pơchơt, hăm jơhngâm đon chơt hơiă ‘nă hal, đe hơioh đei năng hơxoang prao păng lơ tơdrong hơri hơxoang kơ năr Tết Trung thu, pơih pơdăh tơpăt hăm đe hơioh tơ̆ dôm dêh char Hải Phòng, Lâm Đồng, Bình Dương, Tiền Giang păng plt Hồ Chí Minh. Anih pơgơ̆r hơpăh 1.700 tơpu tơmam, đei hŏk jên hŏk ƀŏng, gre tang vang păng tơmam trung thu ăn đe oh hơioh đei tơdrong arih xa pơmat tat tơ̆ dêh char Đắk Lắk.

Pơma tơ̆ âu, Phó Thủ tướng Nguyễn Hòa Bình pôk pơ ư đe kon mon hơioh yoa dôm tơdrong iŏk đei ‘lơ̆ng lơ̆m tơdrong hŏk pơhrăm, adrin yak tŏk lơ̆m tơdrong arih. Hơpơi ‘mĕh đe kon mon hơnơ̆ng tưk tơiung tơdrong juăt ‘lơ̆ng hơiă đơ̆ng đe hơioh Việt Nam.

“Mih hơpơi đĭ đăng đe kon mon đei ngôi pơchơt Trung thu ‘lơ̆ng hơiă hăm hnam tơnŏ, hơnơ̆ng pơm kiơ̆ mă ‘lơ̆ng 5 tơdrong Ƀok Hô pơtho, băt chu yom kơ mĕ ƀă yă ƀok, lui yom kơ thây kô, băt chu yom kơ bơngai kră, mât 1 ƀơ̆r đon, vang tơgŭm ăn bôl boăk đei tơdrong arih xa pơmat tat, mă loi jĭ đe boăl oei pŭ tơdrong hiong răm đơ̆ng ‘mi kial, đak lip, vă kŭm hăm băl năng hŏk, pơhrăm; adrin hŏk vă ning mônh kơnh jing bơngai gơ̆h hơgei, tơgăl jĭ tơ ‘ngla teh đak, khŏm tơiung pơjing teh đak bơ̆n roi đunh roi pơdrŏng ‘lơ̆ng rŏ păng gơh hơgei”.